19.உங்கள் நிறுவனம் சிறிதா? பெரிதா?

“உங்கள் பள்ளிப்பருவத்தில் நீங்கள் வேகப் பந்து வீச்சாளராக வாகை சூடிய கிரிக்கெட் அணிக்கும், இந்தியக் கிரிக்கெட் அணிக்கும் என்ன வித்தியாசம்?” இந்தக் கேள்விக்கு பதில், “எல்லாவற்றிலுமே வித்தியாசம்” என்பதாகத்தான் இருக்கும். பள்ளி அளவிலான கிரிக்கெட் அணி என்று வரும்போது, அணியில் இருக்கும் அத்தனை வீரர்களும் அசகாய சூரர்கள் என்று சொல்ல முடியாது.

எழுத்தாளர் சுஜாதா, பள்ளி மாணவராக இருந்தபோது, ஸ்ரீரங்கம் சிறுவர் கிரிக்கெட் அணியில் ஒரு குழந்தையும் இருந்ததாக எழுதுகிறார் “இவனை சேத்துண்டே ஆகணும்! இவங்க வீட்டிலேதான் கிரிக்கெட் பாட் இருக்கு” என்று அந்த அணியின் கேப்டன் சொல்லிவிட்டதுதான் காரணம்.

சமரசத்திற்காகவோ வேறுவழியில்லாமலோ, படுசுமார் – ஏதோ தேவலை ரகத்தில் இருப்பவர்களையும் அணியில் சேர்க்க வேண்டி வரும்.

அதுவே படிப்படியாக மாவட்ட அணி – மாநில அணி – தேசிய அணி என்று வளரும்போது தேர்ந்தெடுக்கப்பட்ட திறமைசாலிகள் மட்டுமே அந்த அணியில் இடம் பெற முடியும். இது, விளையாட்டில் மட்டுமல்ல. சிறிய நிறுவனங்களுக்கும் பெரிய நிறுவனங்களுக்கும் இருக்கும் வேறுபாடுகூட இதுதான் ….. இதுவேதான்……

உங்கள் நிறுவனம் சிறியதாய் இருக்கிற பட்சத்தில், எல்லாமே பெரும் திறமைசாலிகளாக வந்து சேர்ந்துவிட்டால், இது அதிர்ஷ்டம். ஆனால் அபூர்வம். வருபவர்கள் எப்படி இருந்தாலும் அவர்களுக்கு சரியான வழி காட்டுதலைச் தந்து, போதிய அளவு பயிற்சிகள் கொடுத்து, உரியமுறையில் உத்வேகம் ஊட்டி அவர்களைத் திறமையாளர்கள் ஆக்குவது, சிறிய நிறுவனம் விரைவில் வளர ஒரு வழியாக இருக்கும்.

ஒரு நிறுவனத்தின் வெற்றியும் தோல்வியும், அதன்முதல் பத்து அலுவலர்களின் செயல்திறனில் இருக்கிறது என்றார் ஸ்டீல் ஜாப்ஸ். உங்கள் நிறுவனத்தின் சிக்கல் ஒன்றைத் தீர்க்க பிரத்யேகமாய் ஒரு சாஃப்ட்வேர் உருவாக்குகிற வசதி உங்களிடம் இல்லையென்றால் பரவாயில்லை. உங்கள் முதல் பத்து அலுவலர்களின் யாரேனும் ஒருவருடைய மூளையில் கூட ஒரு மகத்தான யோசனை பளிச்சிடலாம். பொதுவாகவே, சிறிய அளவிலான நிறுவனங்களைப் பொறுத்தவரை, பெரிய பெரிய பிரச்சினைகளைத் தீர்க்கும் பலமும் ஒற்றுமையும் பெரிதாக இருக்கும். தொழில்நுட்பங்கள் கூட ஒரு கால எல்லைக்குப் பிறகு தோற்றுப் போகக்கூடியது. ‘பேஜர்’ என்ற பெயரில் இருந்த கருவி இன்று காலாவதி யாகிவிட்டது. ஆனால், “சொல்லி அனுப்புதல்” என்ற விஷயம் அதற்கு முன்னும் பின்னும் இருந்து கொண்டேதான் இருக்கிறது.

எனவே, உங்கள் நிறுவனம் அளவில் சிறியதாக இருந்தாலும் அதற்காக கவலைப்பட அவசியமில்லை.

சின்ன நிறுவனத்தை போட்டிபோடும் ஒரு பெரிய நிறுவனமோ, அல்லது எதிர்பாராத சந்தை மாற்றமோ கொசு அடிப்பதுபோல் அடித்துவிடும் என்கிற அச்சம் நியாயமானது தான்.

ஆனால் கொசுவிடம் சிறிய நிறுவனங்களை கற்றுக் கொள்ள ஒரு விஷயம் இருக்கிறது என்பதை நிர்வாகவியல் நிபுணர்கள் சொல்கிறார்கள். கொசுவின் கொள்கை, ஒன்றுதான். செய்துமுடி அல்லது செத்துமடி. எதிர்ப்பு நிலையைக் காட்டுவதற்குக் கொசு எதுவும் செய்வதில்லை. ஆனால், தன் வேலையை முடித்துக்கொண்டு பறந்து விடுகிறது. கொசுவிடம் இருக்கும் ஒருகுறைபாடு சிறிய நிறுவனங்களிடம் இல்லாமல் இருந்தால் போதும்.

இரத்தத்தை உறிஞ்சும்போது, சம்பந்தப் பட்டவருக்கு ‘சுள்’ என்று வருகிற வலிதான் கொசுவின் எமன். கடிபட்டவரிடம் அடிபட்டுச் சாகிறது கொசு. ஆனால் சிறிய நிறுவனங்கள் மற்றவர்களைப் பகைத்துக்கொண்டு வளர்ந்தால் தான் அடிவிழும். வளரும் சுவடே தெரியாமல் வளர்ந்து வந்தால் சிக்கலில்லை.

சிறிய நிறுவனத்தை நீங்கள் நடத்துகிறீர்கள் என்றால், ஒரு விஷயத்தில் கூடுதல் கவனம்
செலுத்த வேண்டும். நிறுவனத்தை நடத்துவதும் வளர்ப்பதும் வேறு வேறு விஷயங்கள். நிறுவனத்தை நடத்த ஒருவரும் வளர்த்துவிட ஒருவரும் பாடுபட்டால் தான் சரியான – விரைவான வளர்ச்சி சாத்தியம்.

இதற்கான ஏற்பாட்டை மட்டும் செய்து விட்டால், உங்கள் நிறுவனம் சிறிய நிறுவனம் என்று சொல்லி முடிக்கும் முன்னரே பெரிய நிறுவனமாய் வளர்ந்துவிடும், முயன்றுதான் பாருங்களேன்!!

– மரபின் மைந்தன் ம.முத்தையா

நினைத்தது போலவே வெற்றி என்னும் நூலிலிருந்து…

18. யாருக்காக…. பிரார்த்தனை யாருக்காக…–?

உங்கள் தேவைகளுக்காக மட்டும் பிரார்த்தனை செய்வது சுயநலத்தின் வெளிப்பாடு. உங்களுக்காகவும் பிரார்த்தனை செய்ய வேண்டும், மற்றவர்களுக்காகவும் பிரார்த்தனை செய்ய வேண்டும். அந்த மற்றவர்கள் & யார் யார் என்கிறீர்களா? அது உங்கள் கையில்தான் இருக்கிறது.

ஆமாம்! நீங்கள் யாருக்கெல்லாம் பிரார்த்தனை செய்ய வேண்டும் என்பது உங்கள் கைகளில் இருக்கிறது. உங்கள் சமய மரபின் படி நீங்கள் பிரார்த்னை வேளையில் கைகளைக் குவித்திருந்தாலும் சரி, விரித்திருந்தாலும் சரி – விரல்களைக் கவனியுங்கள். அதில்தான் விஷயம் இருக்கிறது. இப்படியரு சுவாரசியமான விஷயத்தை இணையத்தில் படித்தேன்.

உங்களுக்கு நெருக்கமாக இருப்பது, கட்டைவிரல். ஆகவே, உங்களுக்கு நெருக்கமானவர்கள் அனைவருக்கும் இது அடையாளம். உங்கள் குடும்பம் -உங்கள் நண்பர்கள் – உங்கள் அலுவலக சகாக்கள் -அக்கம் பக்கத்தில் இருப்பவர்கள் – இவர்களுக்காகப் பிரார்த்தனை செய்ய உங்கள் கட்டைவிரல் நினைவுபடுத்துகிறது. நெருக்கமானவர்களுக்காக நீங்கள் பிரார்த்தனை செய்யும்போது, அவர்கள் நலம் அடைவதோடு, உங்களைக் காண்கிறபோதெல்லாம் இனம்புரியாத நெகிழ்ச்சியை உணர்வார்கள்.

அடுத்தாற்போல் இருப்பது, சுட்டுவிரல். திசை தெரியாமல் தவிப்பவர்களுக்கொரு வழிகாட்டும் நல்ல செயல்களை செய்பவர்களுக்கு சுட்டுவிரல் அடையாளம். கல்விக் கண் திறக்கும் ஆசிரியர்கள் – நோய் தீர்க்கும் மருத்துவர்கள் -புதிய கண்டுபிடிப்புகளைக் கொண்டு வந்து கொடுக்கும் விஞ்ஞானிகள் போன்றோர் பொறுப்புணர்வுடனும் விழிப்புணர்வுடனும் செயல்பட வேண்டுமென்று பிரார்த்தனை செய்வதும் நம் கடமை. அப்படிச் செய்வதன் மூலம் நம்முடைய பிரார்த்தனை பலம் தோன்றாத் துணையாக அவர்களுக்கு வேண்டிய வல்லமையை வழங்கும்.

அதற்கடுத்தது, நடு விரல். எல்லா விரல்களையும்விட உயரமாய் நிமிர்ந்து நிற்கிற நடுவிரல் – தலைமை நிலையில் இருப்பவர்களுக்கான அடையாளம். உங்கள் பணியிடத்தில் தலைமை நிலையில் இருப்பவர்கள் தொடங்கி, சமூகத் தலைவர்கள், இயக்கங்களின் தலைவர்கள், ஆளும் தலைவர்கள் என்று யாராக இருந்தாலும், அவர்கள் மனதில் நல்ல எண்ணங்களே உருவாக வேண்டுமென்றும், அவர்கள் மனதில் தோன்றும் முக்கியமான தீர்மானங்கள் மனித குலத்துக்கு மகிழ்ச்சி ஏற்படுத்த வேண்டுமென்றும் பிரார்த்தனை செய்ய வேண்டும். இதனை உங்கள் நடுவிரல் நினைவுபடுத்துகிறது.

நான்காவதாய் உங்கள் மோதிர விரல். ஐந்து விரல்களிலேயே இதுதான் மிகவும் பலவீனமான விரல். தட்டச்சு செய்பவர்களுக்கும், பியானோ வாசிப்பவர்களுக்கும் இது நன்றாகவே தெரியும். விரைவில் சேதமுறக்கூடிய இந்த விரல், சமூக அமைப்பில் பலவீனமானவர்களை நமக்கு நினைவுபடுத்துகிறது. இவர்களுக்காகவும் பிரார்த்தனை செய்யும் கடமை நமக்கு இருக்கிறது. கடைசியாய் இருப்பது சுண்டுவிரல். கடவுள் என்னும் பெரும் சக்தியின் முன் நாம் எவ்வளவு சிறியவர்கள் என்பதை இந்த விரல் நினைவுபடுத்துகிறது.
மற்றவர்களுக்காக பிரார்த்தனை செய்த மன நிறைவோடு, நமக்கான பிரார்த்தனையைக் கடைசியாக முன் வைக்கிறோம். ஒரு வகையில் பார்த்தால், இதுதான் பிரார்த்தனைக்கான தகுதி. யார், தன்னையும் தன் தேவைகளையும் கடைசியில் வைக்கிறாரோ, அவரே கடவுளின் பார்வையில் முதலாவதாக இருப்பார். ஒவ்வொரு நாளும் இப்படி பிரார்த்தனை செய்கிறபோது, இயல்பாகவே எல்லோராலும் விரும்பப்படும் மனிதராக வளர்கிறீர்கள். எல்லோரையும் நேசிக்கும் மனிதராகவும் மலர்கிறீர்கள்.

– மரபின் மைந்தன் ம.முத்தையா

நினைத்தது போலவே வெற்றி என்னும் நூலிலிருந்து…

17. நம்பகமானவரா நீங்கள்?

“என்னை நம்புங்கள்! நான் நம்பத்தகுந்த ஆள்தான்!” என யாராவது சொன்னால், அவர்களை நம்மால் நம்ப முடியுமா என்ன? ஒருவரின் நம்பகத்தன்மை அவரது வார்த்தைகளில் மட்டுமில்லை. தந்த வார்த்தைகளைக் காப்பாற்றுவதில் இருக்கிறது. மனித உறவுகளைக் கட்டமைக்கும் பலமான அஸ்திவாரமே பரஸ்பர நம்பிக்கைதான். ஒரு மனிதன் எதை இழந்தாலும் நம்பகத்தன்மை மட்டும் இருந்தால், அதனைக் கொண்டு இழந்தவை அனைத்தையும் மீட்கலாம். ஆனால், நம்பகத் தன்மையை இழந்துவிட்டால் பின்னர் எதுவுமே இருக்காது. நீங்கள் அனைவருடைய உள்ளங்களிலும் நம்பகமானவராய் நிலைபெறவென்று சில வழிமுறைகள் உண்டு.

சொன்ன சொல்லைக் காப்பது:
நாம் சொன்ன சொல்லைக் காக்க முடியாமல் நம்மையும் மீறிய காரணங்கள் ஏற்படலாம். அவற்றையும் மீறி, சொன்ன சொல்லைக் காப்பதே, சிறந்தது. நமது நம்பிக்கை மாத இதழின் தொடக்க விழா 2004 மே 3ஆம் தேதி நடைபெற்றது. மாலை 5.40க்குள் அரங்குக்கு வருவதாக விழாவின் சிறப்பு விருந்தினர்களில் ஒருவரான டாக்டர் வினுஅறம் குறிப்பிட்டிருந்தார். அவரது விலையுயர்ந்த கார் வருவதற்கான சுவடே 5.45 வரை தெரியவில்லை.

5.48 இருக்கும், ‘சர்’ரென்று ஓர் ஆட்டோ வந்து நின்றது. வழியில் பழுதான காரை சாலை ஓரத்தில் நிறுத்திவிட்டு, அவசரம் அவசரமாய் ஆட்டோ பிடித்து பத்து நிமிடங்கள் முன்பாய் அரங்கம் வந்து சேர்ந்தார் அவர். இது, சொன்ன சொல்லைக் காப்பதன் அடையாளம்.

சின்ன சொல்லையும் காப்பது:
ஒருவர் பெரியதோர் உதவிகேட்டு உங்களிடம் வருகிறார். புதன்கிழமை சாயங்காலம் ஆறுமணிக்கு நேரில் வந்து செய்து கொடுப்பதாய் சொல்கிறீர்கள். உங்கள் வீட்டு சி.டி.யில் அபூர்வமாய் பாடல் ஒலிக்கிறது. வந்தவர் ஆவலுடன் வினவும்போது “இதென்ன பிரமாதம்! புதன்கிழமை வரும்போது உங்களுக்கு ஒன்று தருகிறேன்” என்கிறீர்கள். புதன்கிழமை பெரிய உதவியைச் செய்து தரப்போகும்போது இந்தச் சின்ன விஷயத்தையும் மறவாமல் செய்து கொடுப்பீர்களென்றால் உங்கள் மதிப்பும் நம்பகத்தன்மையும் பல மடங்குகள் உயர்ந்துவிடும்.

வார்த்தை தரும்போது கவனமாய் இருங்கள்:
ஒன்றைத் தருவதாகவோ, ஓர் இடத்திற்கு வருவதாகவோ, வார்த்தை தரும்போது, நாள் – நேரம் – இடம் போன்றவற்றைத் தெளிவாகக் குறிப்பிடுங்கள். அதற்கு முன்னால், அந்த விஷயத்தை உங்களால் செய்து தரமுடியுமா என்று ஒருமுறைக்க இரண்டு முறை நன்றாக யோசித்துக்கொள்ளுங்கள். அதன்பின்னால், உங்களால் முடியும் என்பதையோ, முடியாது என்பதையோ தெளிவாகச் சொல்லிவிடுங்கள்.

வார்த்தை தவறினால்:
உங்களையும் மீறி எப்போதாவது சொன்ன சொல் தவற நேர்ந்தால், முன்கூட்டியே சம்பந்தப்பட்டவர்களிடம் தகவல் தந்து வருத்தமும் தெரிவியுங்கள். அது உங்கள் தொழில் சார்ந்ததாக இருந்தாலும் சரி, நீங்கள் செய்து தரும் உதவியாக இருந்தாலும் சரி நாம் தந்த வார்த்தையை மீற நமக்கே உரிமையில்லை என்பதை மனதில் உணர்ந்து, கூடிய விரைவில் அதனைச் செய்து தர முயலுங்கள்.

நம்பகத் தன்மைகள் கொடுக்கும் நன்மைகள்:
உலகம் உங்களை நம்பத் தொடங்கும்.
உயர்ந்த இடங்களில் இருப்பவர்கள் உங்கள் மேலுளள நம்பிக்கையால் உதவுவார்கள்.

உங்கள் பெயரை மற்றவர்களுக்கும் பரிந்துரை செய்வார்கள் – உங்கள் வட்டம் விரிவடையும்.

உங்களால் ஒரு சில நேரங்களில் சரியான நேரத்தில் செய்து தரமுடியாதபோதும் உங்களைப் புரிந்துகொள்வார்கள்.

உங்கள் மேல் உங்களுக்கே நம்பிக்கை அதிகரிக்கும்!

– மரபின் மைந்தன் ம.முத்தையா

நினைத்தது போலவே வெற்றி என்னும் நூலிலிருந்து…

16. நேர்காணலில் நீங்கள்!

பணியில் சேர விண்ணப்பிப்பவர்கள் யாராக இருந்தாலும் அவர்களிடம் இரண்டுவிதமான தகுதிகளை நிர்வாகம் எதிர்பார்க்கும். ஒன்று, அந்தப் பணியை செய்வதற்கான தொழில் நூல் ரீதியான தகுதிகள். இன்னொன்று, மனித வள அடிப்படையில் ஒரு பணியாளராக – நிறுவனத்தின் கூட்டு முயற்சியில் தோள் கொடுப்பவராக – உங்கள் தகுதிகள்.

இந்த இரண்டில், முதலாவது அம்சம் நீங்கள் முயன்று பெற்ற தகுதிகள். இரண்டாவது அம்சம். நீங்கள் கூர்மைப்படுத்திக்கொண்டு இருக்கக்கூடிய தகுதிகள். உங்களைச் சந்தித்த நாள் முதல் நிமிடத்திலிருந்து, உங்களைப் பற்றிய முதல் அபிப்பிராயத்தை உருவாக்கப் போகிறவை இந்தக்கூடுதல் தகுதிகள்தான்.

பதற்றம், பயம் போன்றவை முகத்திலேயே நின்று முன்னுரை எழுதும். பதற்றமும் பயமும் உங்கள் தகுதி பற்றிய உங்களுக்கே இருக்கும் குறைவான மதிப்பீட்டின் அடையாளங்கள். பதற்றத்தில் இருக்கும்போது கேட்கப்படுகிற கேள்விகளை உங்களால் முழுமையாக உள்வாங்க முடியாது. கேள்வி புரியாதபோது, வார்த்தைகளில் தடுமாற்றம் வந்து உங்களையும் நம்பிக்கை இழக்கச் செய்யும். மனதை அமைதியாக்கிக் கொண்டு நேர்காணல் அறைக்குள் நுழைவது அவசியம். மூச்சை ஆழ இழுத்துவிடுகிற பயிற்சியை மேற்கொள்வது, கண்மூடி சிறிதுநேரம் அமர்ந்திருப்பது போன்றவை நேர்காணலுக்கு ஓரிரு மணி நேரங்கள் முன்னதாகவே செய்யலாம்.

கேட்கப்பட்ட கேள்வியை முழுமையாக உள்வாங்கிக்கொண்டு உங்களுக்குச் சரியென்று படுகிற பதிலை நிதானமாகவும் உறுதியாகவும் சொல்லுங்கள். உங்கள் விடை தவறென்று கேள்வி கேட்பவர்கள் தெரிவித்தால், வருத்தம் தெரிவித்துவிட்டு, சரியான பதிலைத் தெரிந்துகொள்ள ஆர்வம் காட்டுங்கள். நீங்கள் சொன்ன பதிலுக்கு இருக்கும் அதே முக்கியத்துவம், பதில் சொன்ன தோரணையிலும் வெளிப்படும் என்பதை மறந்துவிடாதீர்கள். பெரும்பாலும் நேர்காணல்களில் கேட்கப்படுகிற முதல் கேள்வி, “உங்களைப் பற்றிச் சொல்லுங்கள்” என்பதுதான்.

பல பேர் தங்கள் பிறப்பு – பிறந்த தேதி – பிறந்த மருத்துவமனையில் தொடங்கி, பெற்றோர் பற்றிய விபரம் – அக்கா, அண்ணன் எங்கே வேலை பார்க்கிறார்கள் என்று பட்டியல்போட்டு, “குலமுறை கிளத்து படலம்” ஒன்றையே சொல்லி முடிப்பார்கள்.

இப்படிச் சொன்னால், கேள்வி கேட்பவருக்கு நீங்கள் வேலைதேடி வந்திருக்கிறீர்களா? கல்யாணத்திற்கு வரன்தேடி வந்திருக்கிறீர்களா என்ற சந்தேகம் எழ வாய்ப்பிருக்கிறது.

‘உங்களைப் பற்றிச் சொல்லுங்கள்’ என்றால் உங்கள் கல்வித்தகுதி, வேலை பார்த்த அனுபவம் அல்லது அது தொடர்பாக நீங்கள் பெற்ற சிறப்புப் பயிற்சிகள் – கூட்டாகப் பணிபுரிவதில் உங்களுக்கும் ஆர்வம் – உங்களின் அணுகுமுறை ஆகிய விஷயங்களைத்தான் எதிர்பார்க்கிறார்கள். இந்த விவரங்களைப் பட்டியல் போட்ட பிறகு, குடும்பம் பற்றி இரண்டு மூன்று வரிகளில் சுருக்கமாகச் சொல்லி முடித்துக்கொள்ளலாம்.

சமீப காலமாய் நேர்காணல்களில் கேட்கப்படுகிற கேள்விகளில் ஒன்று, “உங்கள் பலவீனங்கள் என்ன?” என்பது. இந்தக் கேள்வி காதில் விழுந்ததுமே, சிலர் உணர்ச்சி வசப்பட்டு, கண்களில் நீர் மல்க, மண்டியிடாத குறையாய் பாவ மன்னிப்பு கேட்கிற பாவனையில், தங்கள் பலவீனங்கள் – தவறுகள் – தகுதிக் குறைவுகள் என்று பட்டியல் போட்டு, கைக்குட்டையை எடுத்துக் கண்களைத் துடைத்துக்கொள்ளும் அளவுக்குப் போய்விடுவார்கள்.

இப்படிச் செய்வதில், கேள்வி கேட்பவர்களும், “கடவுள் உங்களைக் காப்பாற்றட்டும்” என்று ஆசீர்வதித்து அனுப்பிவிட வாய்ப்பிருக்கிறது.

உங்களைப் பற்றிய உண்மைகளைச் சொல்லலாம். ஆனால் உங்கள் மேல் நம்பிக்கையிழக்கச் செய்யும்விதமாக சொல்லக்கூடாது. உங்கள் சிறிய பலவீனம் ஒன்றைச் சொல்லி அதை எப்படி சரிசெய்து கொண்டீர்கள் – அல்லது சரி செய்து வருகிறீர்கள் என்பதையும் சொல்ல வேண்டும்.

உதாரணமாக, “மறதி என் பலவீனமாக இருந்தது. என் பலவீனமாக இருந்தது. எனவே எல்லாவற்றையும் எழுதிவைத்துக் கொண்டு செய்யப்பழகிவிட்டேன்” என்று சொல்லலாம்.

அதேபோல, “உங்கள் பலங்கள் என்ன?” என்று கேட்கிறபோது சிலர், “உங்கள் நிறுவனம் சரிந்து கொண்டிருக்கிறது. சரி செய்ய நானிருக்கிறேன்” என்று எல்லை மீறிய உற்சாகத்தில் பேசுவதுண்டு.
உங்களிடம் உள்ள தனித்தன்மை, நிறுவனத்தின் வளர்ச்சியில் பயன்படக்கூடிய உங்கள் அணுகுமுறை – உங்களின் நல்ல இயல்புகள் ஆகியவற்றை அடக்கமாக – ஆனால் – அழுத்தமாகச் சொல்லலாம். இதற்கு முன்னர் பணிபுரிந்த இடம் பற்றிக் கேட்கிறபோது, அந்த நிறுவனத்தின் குறைகளில் தொடங்காதீர்கள். அதற்கு இரண்டு காரணங்கள் உண்டு. நிறுவன உரிமையாளர்கள் எல்லோரும் எப்போதும் தனிக்கட்சி. அலுவலர்களின் விமர்சனங்களை ஏற்கும் மனப்பான்மை பலருக்கும் இருப்பதில்லை. விளம்பர நிறுவனமொன்றை நடத்தி வந்த மனிதர், கூடுதலாக சில தொழில்கள் செய்து கொண்டிருந்தார். அவரிடம் வேலை கேட்டு வந்தார் ஓர் இளைஞர். முந்தைய நிறுவனம் பற்றிக் கேட்டபோது அந்த இளைஞர், “எங்க ஓனருக்கு வேற தொழில் இருக்கு. அதனாலே இதிலே கவனம் செலுத்தறதில்லை” என்றதும் இவருக்கு வந்ததே கோபம்!! “அதனாலென்ன? அவர் உங்களுக்கு சம்பளம் தருகிறாரல்லவா?” என்று பொரிந்து தள்ளிவிட்டார். இவர்கள் எல்லோரும் ஒரே ஜாதி….

இரண்டாவது காணரம், நீங்கள் இந்த நிறுவனத்தைவிட்டு வெளியேற நேர்ந்தால் இதேபோல வெளியே போய் சொல்வீர்கள் என்று கருதுவார்கள்.

எனவே, முந்தைய நிறுவனத்தைவிட்டு வெளியேற தனிப்பட்ட காரணங்கள் இருந்தால் சொல்லுங்கள். “உங்கள் நிறுவனத்தில் வளர்ச்சி அதிக வாய்ப்பு உள்ளதாக எண்ணுகிறேன்” என்பது போன்ற குளுமையான பதில்களைக் கூறலாம். முந்தைய நிறுவனத்திடமிருந்து நீங்கள் சுமூகமாகப் பிரிந்து வந்திருந்தால் அவர்களிடமிருந்து பெற்ற நற்சான்றுக் கடிதத்தைக் காட்டலாம். பிரிய நேர்ந்தாலும் பிரச்சினை செய்ய மாட்டீர்கள் என்ற நம்பிக்கையை ஏற்படுத்துவது மிகவும் முக்கியம்.

உங்களிடம் நீங்கள் மாற்றிக்கொள்ள விரும்புகிற விஷயங்கள் என்ன என்று அப்பாவியாக முகத்தை வைத்துக்கொண்டு கேள்வியாளர் கேட்கலாம். அகப்பட்டுக் கொள்ளாதீர்கள். பொருட்படுத்தவே முடியாத சின்ன விஷயங்களைச் சொல்லுங்கள். “எங்கே ஐஸ்க்ரீம் கிடைத்தாலும் ஒரு கை பார்ப்பதுண்டு. இப்போது கொஞ்சம் கொஞ்சமாய் மாறிவருகிறேன்” என்று பதில் சொல்லுங்கள். கேள்வியாளருக்கு ஐஸ்க்ரீம் பிடித்தாலும் பிடிக்காவிட்டாலும் இந்த பதில் அவருக்குப் பிடிக்கும்.

“எங்கள் நிறுவனம் பற்றி என்ன தெரியும்?” என்ற கேள்வி கண்டிப்பாக இடம் பெறும். எந்த நிறுவனத்தில் வேலை கேட்டுப் போகிறீர்களோ, அந்த நிறுவனம் குறித்து நன்றாகவே தெரிந்திருப்பது அவசியம்.

அப்புறம் உங்கள் சமயோசிதத்தையும் தெளிவையும் சோதிக்கிற கேள்விகள் சில இடம்பெறும். “உங்களுக்குப் பின்புறம் உள்ள சுவரின் நிறமென்ன?” இது ஓர் உதாரணம். உடனே நீங்கள் பின்னால் திரும்பிப்பார்த்து பதில் சொல்லக்கூடாது. உங்கள் முன்னே இருக்கிற சுவரின் நிறம்தான் பின்னாலும் இருக்கும். நீங்கள் ஏதேனும் வண்ணமாக இருந்தால் என்னவாக இருப்பீர்கள் என்றொரு நேர்காணலில் கேட்கப்பட்டது. சிலர் தங்களுக்குப் பிடித்த நிறங்களைச் சொன்னார்கள். ஒருவர், “எனக்குப் பஞ்சுமிட்டாய் மிகவும் பிடிக்கும். எனவே பிங்க் நிறமாக இருப்பேன்” என்று மழலைக்குரலில் எல்லாம் பதில் சொன்னார்.

வேலை யாருக்குக் கொடுக்கப்பட்டது என்பதைவிட, அவர் என்ன பதில் சொன்னார் என்பது முக்கியம். “நான் மிகவும் அமைதியானவன். எதையும் ஆழமாக ஆலோசிப்பேன். எனவே, இருந்தால் நீ நிறமாக இருப்பேன்” என்றார்.

வித்தியாசமாக சிந்திப்பதாய் நினைத்து வினோதமாக பதில் சொல்லாமல் விவரமான பதில்களைக் கொடுங்கள். உங்கள் மேல் நம்பிக்கையை – முடிந்தால் பிரம்மிப்பை ஏற்படுத்துங்கள். வெற்றி நிச்சயம்!

– மரபின் மைந்தன் ம.முத்தையா

நினைத்தது போலவே வெற்றி என்னும் நூலிலிருந்து…

மாற்றங்களுக்கு ஈடு கொடுங்கள்!

சந்தைச் சூழலில் எந்தவித மாற்றங்கள் ஏற்பட்டாலும் அதற்குரிய வாசல்களைத் திறந்து கொள்ளும் வித்தையைக் கற்றுக்கொள்ளுங்கள். பெரிய பெரிய நிறுவனங்களுக்குக் கூடப் போக வேண்டாம். முதல் பூக்கடை எப்படி உருவாகியிருக்கும் என்று கற்பனை செய்து பாருங்கள். முதலில் உதிரியாக பூக்களை விற்கத் தொடங்கியிருப்பார்கள். பிறகு, அவற்றைத் தலையில் சூடிக்கொள்ளவோ, கடவுளுக்குச் சூட்டவோ வசதியாக சரமாகத் தொடுத்திருப்பார்கள். அதையே பெரிய அளவில் கற்பனை செய்து மாலைகளாகக் கட்டியிருப்பார்கள். பூ என்றால் மங்கலச் சின்னம் மலர் மாலைகள் மட்டுமே தயார் செய்வோம் என்று சொல்லாமல் மலர் வளையங்களையும் விற்பனை செய்யத் தொடங்குகிறார்கள்.

புத்தம் புதிய வழக்கமான பூங்கொத்துவரை இன்று பூக்கடைகளில் கிடைக்கின்றன. பூ விற்பதிலேயே இத்தனை புதுமைகளுக்கும் மாற்றங்களுக்கும் இடம் தர வேண்டியிருக்கிறது.

சில விஷயங்களில் வளைந்து கொடுங்கள். எல்லாவற்றிலும் பிடித்த பிடியில் பிடிவாதமாய் இருக்கும் விதமாய் இன்றைய சந்தைகள் இருப்பதில்லை. பேரம் பேசுவதில் தொடங்கி குறிப்பிட்ட தேதிக்கு முன்னரே உங்கள் தயாரிப்பைத் தொடங்க வேண்டிய நிர்ப்பந்தங்கள் வரை எத்தனையோ அம்சங்கள் உங்கள் தொழில் செய்யும் முறையில் மாற்றங்களை எதிர்நோக்கி இருக்கக்கூடும். “கறார் விலை” கடைகளின் காலம் இனியும் தொடர்வது அபூர்வமாக சில இடங்களில் நிகழலாம். ஒரு நிறுவனத்தின் விதிமுறைகள் அனைத்துமே திருத்த முடியாது. சட்டங்கள் போல் இறுகி இருக்க இயலாது என்கிற சூழ்நிலை உருவாகி விட்டது.

வாடிக்கையாளர்களுக்கு முதலிடம் கொடுங்கள். உங்கள் நிறுவனத்தில் எந்த நிலையில் இருக்கும் அலுவலராலும் வாடிக்கையாளர்கள் மனம் கோணாமல் பார்த்துக்கொள்வது மிகவும் அவசியம். இன்று வாடிக்கையாளர்களின் எதிர்பார்ப்பு அளவில் உச்சம் நோக்கி மனநிறைவு என்கிற இலக்கைத் தொடுகிற போதெல்லாம் நீங்கள் எதிர்பார்க்காத திசைகளிலிருந்து புதிய வாடிக்கையாளர்கள் வந்து சேர்வார்கள்.

தயாரிப்புகளின் தரத்திலும் உள்ளடகத்திலும் நீங்கள் அடிக்கடி கொண்டுவருகிற முன்னேற்றம் – அங்கீகரிக்கப்பட்ட தரச் சான்றிதழ்களைப் பெற நீங்கள் மேற்கொள்கிற முயற்சி – உங்கள் துறையிலேயே நீங்கள் புதிதுபுதிதாய் அறிமுகம் செய்யும் தயாரிப்புகள் – வாடிக்கையாளர் வசதிக்கும் வியப்புக்கும் வாய்ப்பாக நீங்கள் செய்கிற விரிவாக்கம் – அவ்வப்போது அளிக்கிற சலுகைகள், இவையெல்லாம் வாடிக்கையாளர்களுக்காக நீங்கள் புதுமைகள் நிகழ்த்தத் தயாராயிருக்கிறீர்கள் என்கிற நம்பிக்கையை ஏற்படுத்துகிறது.

தமிழகக் காவல்துறையில், புதிய வாகனங்கள் அறிமுகப்படுத்தப்பட்டதும், அவர்களைத் தொடர்பு கொள்ளும் முறைகள் எளிமைப்படுத்தப்பட்டதும், முன்மாதிரி காவல்நிலையங்கள் உருவாக்கிவிட்டதும் காவல்துறையில் புதுமைகளைப் புகுத்துவதற்கான முயற்சிகள்தான். அயல்நாடுகளில் கிராஃபிட்டி என்ற பெயரில் தயாரிக்கப்படும் குளிர்சாதனப்பெட்டிகளில் எழுத வசதியாய் ஒரு வெள்ளைப் பலகை பொருத்தப்பட்டது. சமையலறையில் ஞாபகக் குறிப்புகளில் தொடங்கி – “உள்ளே பால் இருக்கிறது. சூடு செய்து காப்பி போட்டுக் கொள்ளுங்கள்” என்று கணவனுக்குக் குறிப்பு எழுதுவதுவரை எத்தனையோ விஷயங்களுக்கு இந்தப் புதுமையான அணுகுமுறை பயன்பட்டது.

புதுமைக்கான ஆர்வத்தின் நெருப்பு அணைய விடாமல் பார்த்துக்கொள்ளுங்கள். உங்கள் தொழிலில் எல்லா வெளிச்சங்களுக்கும் அதுவே வழிவகுக்கும்.

– மரபின் மைந்தன் ம.முத்தையா

நினைத்தது போலவே வெற்றி என்னும் நூலிலிருந்து…

15. புதுமை உங்கள் பிறப்புரிமை!

நீங்கள் எதைச் செய்துகொண்டிருந்தாலும், எதற்கு முதலிடம் தருகிறீர்கள் என்பதை, கீழ்க்கண்ட பட்டியலைப் பார்த்துச் சொல்லுங்கள்.

1. செய்யும் தொழிலிலோ, வேலையிலோ தக்க வைத்துக்கொண்டு மெல்ல மெல்ல வளரலாம் என்று பார்க்கிறீர்களா?

2. உங்களிடம் பணிபுரிபவர்கள், புதிய திறமைகளை வெளிப்படுத்தி, புதிய நுட்பங்களைக் கற்றறியாவிட்டாலும் பரவாயில்லை – சொல்கிற வேலையை சரியாகச் செய்தாலே போதும் என்று நினைக்கிறீர்களா?

3. மாறிவரும் சூழலுக்கேற்ப, முன்னேற்றம் நோக்கிய மாற்றங்களை முதலில் உங்களிடமும் – பிறகு உங்கள் பணியாளர்களிடமும் – உங்கள் ஒட்டுமொத்த சூழலிலும் உருவாக்க விரும்புகிறீர்களா?

இதிலுள்ள மூன்றாவது எண்ணத்திற்கே நீங்கள் முதலிடம் தருவதாக இருந்தால் புதுமை உங்கள் பிறப்புரிமை என்பதை நீங்கள் உணர்ந்து இருப்பதாகப் பொருள்.

செய்வதைத் தக்கவைத்துக்கொள்ள முயல்வது என்பதற்குப் பச்சையான அர்த்தம் என்ன தெரியுமா? ஏற்கனவே இருக்கும் சிக்கல்களைத் தீர்க்கத் தெரியவில்லை என்பதுதான் அர்த்தம்.

அன்றாட நடைமுறைகளிலேயே ஆயிரம் சிக்கல்களை வைத்துக்கொண்டு தீர்க்க முடியாமல் தடுமாறுபவர்கள்தான் இருப்பதை சரியாகச் செய்தால்போதும் என்று கருதுவார்கள்.

ஒரு நிறுவனத்தில் பெரிய தலைவலியாக இருப்பது எது என்று நிச்சயம் தெரியும். நிறுவனத்தில் இருப்பவர்கள் அந்தத் தலைவலியை தினம்தினம் அனுபவித்துக் கொண்டிருப்பார்கள் என்றால், அது மிகவும் தவறான அணுகுமுறை. வலிகளோடும் சிக்கல்களோடும் வாழப் பழகுவது எந்த வளர்ச்சிக்கும் இடம் தராது.

எனவே புதுமை நோக்கிய முதல் படியே சிக்கலற்ற – சீரான நடைமுறைகளை நிறுவனத்தில் கொண்டுவருவதுதான்.

SAP – என்ற அமெரிக்க நிறுவனம் வெற்றிகரமான நிறுவனங்களை ஆராய்ந்ததில் ஓர் அடிப்படையைக் கண்டறிந்திருக்கிறது. “தங்கள் நிறுவனத்திற்கு தேவைகள் என்ன – எவற்றுக்கு முதலிடம் தரவேண்டும் – அவற்றை விரைவாகவும் திறமையாகவும் நடைமுறைப்படுத்துவது எப்படி?” இந்த மூன்று கேள்விகளுக்கும் எந்த நிறுவனத்திடம் விடைகள் உண்டோ அந்த நிறுவனம் பல புதுமைகளை உள்வாங்கிக் கொண்டு வேகமாக வளர்கிறது.

– மரபின் மைந்தன் ம.முத்தையா

நினைத்தது போலவே வெற்றி என்னும் நூலிலிருந்து…

வெற்றியை அளந்தால் விபரம் புரியும்! – 2

வெற்றியின் இன்னோர் அளவுகோல் வெற்றிகளைத் தொடர்கதையாக்குதல். ஒரு வெற்றி வந்த மாத்திரத்திலேயே, தொடர்ந்து வெற்றிகளைக் குவிக்கிற வேகம் வரவேண்டும். முதல் வெற்றி வந்தபிறகு, அடுத்த கட்டமாக முயற்சிகள் செய்து, தோல்வி ஏற்பட்டால் என்ன செய்வது என்கிற அச்சம் ஏற்பட்டுவிடுமென்றால், சிலர் முயற்சிகளைத் தொடர மாட்டார்கள்.

வெற்றியை நிகழ்த்திக் காட்டிய யாருக்கும், அந்த வெற்றியை உலகம் நினைவில் வைத்திருக்கும் என்பதற்கு உத்திரவாதம் கிடையாது. தொடர்ந்து வெற்றிகளை நிகழ்த்திக் காட்டிக்கொண்டே இருக்கிறபோதுதான் ஒருவர் வெற்றியாளர் என்கிற அங்கீகாரத்தைப் பெறுகிறார்.

வெற்றிக்கு இன்னுமோர் அளவுகோல், அந்த வெற்றியைப் பெற்ற வழி. உழைப்பு, திட்டமிடுதல், சமயோசிதம், துணிவு, முடிவெடுக்கும் ஆற்றல் ஆகிய அடித்தளங்கள்மீது கட்டப்படுகிற வெற்றியின் கட்டிடம்தான் உங்களுடைய வெற்றி என்று கொண்டாடத் தக்கது.

மற்றவர்கள் மூலம் கிடைக்கும் வெற்றி, யானை மாலை போட்டு ராஜா ஆன கதையாகத் தான் இருக்கும்.

வெற்றியின் மற்றோர் அளவுகோல் மேம்பாடு. முதல் வெற்றிக்குப் பிறகு உங்கள் உழைப்பின் தரம் மேம்பட்டிருக்கிறதா? உங்கள் தயாரிப்பின் தரம் மேம்பட்டிருக்கிறதா? உங்கள் நம்பிக்கையின் தரம் மேம்பட்டிருக்கிறதா? நீங்கள் பழகும் இயல்புகளில் மேம்பாடு தெரிகிறதா? என்றெல்லாம் இந்தச் சமூகம் கவனிக்கும்.

ஒவ்வொரு வெற்றிக்குப் பிறகும், நீங்கள் விளையாடும் களம் மாறிக்கொண்டேயிருக்க வேண்டும். தொடங்கும்போது யாரைப் போட்டியாளர் என்று நீங்கள் கருதினீர்களோ அவரைத் தாண்டி வெகுதூரம் நீங்கள் வந்திருக்க வேண்டும். எட்டவே முடியாத உயரத்தில் இருக்கிறார் என்று யாரை நீங்கள் அண்ணாந்து பார்த்தீர்களோ, அவர் உங்கள் அடுத்த போட்டியாளராக இருக்க வேண்டும். அவரையும் வென்றுவிட்டு, “மளமள”வென்று அடுத்த கட்டம் நோக்கி நகர வேண்டும்.

வெற்றியை உறுதிப்படுத்தும் இன்னோர் உன்னதமான அளவுகோல் எது தெரியுமா? நீங்கள் பெற்ற வெற்றிகள் பற்றியும் அதற்குக் கையாண்ட வழிமுறைகள், தாண்டி வந்த தடைகள் பற்றியும் உங்களுக்கு ஒரு தெளிவு இருப்பதுதான். இந்த இடத்திற்கு எப்படி வந்தீர்கள் என்று யாராவது கேட்டால், துல்லியமாக சொல்லத் தெரியும் என்றால்தான் உங்கள் வெற்றி நீங்களே முயன்று பெற்றது என்பதை ஏற்பார்கள்.

உலகத்திற்காக வாழ வேண்டும் என்ற கேள்வியைப் புறந்தள்ளுங்கள் – மிக நிச்சயமாக உலகம் ஒவ்வொரு மனிதனையும் உன்னிப்பாக கவனிக்கிறது. உண்மையாக உழைத்து ஜெயிப்பவனை மற்றவர்களுக்கு சுட்டிகாட்டுகிறது. அவனைப் பற்றிய விஷயங்களை சேகரிக்கிறது. உங்கள் வெற்றியின் போக்கை நீங்களே அளந்து பாருங்கள்! மேலும் மேலும் வெற்றிகள் வசப்பட்டே தீரும்!!

– மரபின் மைந்தன் ம.முத்தையா

நினைத்தது போலவே வெற்றி என்னும் நூலிலிருந்து…

14. வெற்றியை அளந்தால் விபரம் புரியும்! – 1

வெற்றியின் அளவுகோல்கள் விதம்விதமானவை. வித்தியாசமானவை. இருந்தாலும் நீங்கள் வெற்றி பெற்றிருக்கிறீர்களா என்பதைக் கண்டறிய சில எளிய அளவுகோல்கள் உண்டு.

ஒரு துறையில் ஈடுபடும்போது, அதில் உங்கள் வளர்ச்சி அனைத்துப் படிநிலைகளிலும் ஏற்பட்டிருக்கிறதா என்று முதலில் பாருங்கள். உதாரணமாக – நீங்கள் செய்யும் பணிகளால் உங்களுக்குப் பாராட்டுக் கிடைக்கிறது. புகழ் வளர்கிறது. எல்லோரும் உங்களை நாடி வருகிறார்கள். இதெல்லாம் சரி, உங்களுக்கு இதனால் பொருளாதார நன்மை ஏற்படுகிறதா?

“மற்றவை எல்லாம் கிடைக்கிறது. பணம் கிடைக்கவில்லை. அதனால் என்ன! ஆத்ம திருப்தி கிடைக்கிறதே” என்று நீங்கள் சொல்வீர்களேயானால், உங்களை நீங்களே சமாதானப்படுத்திக் கொள்கிறீர்கள்.

எந்த ஒரு வேலைக்காக நீண்ட நேரம் செலவிடுகிறீர்களோ, அதில் எல்லாம் கிடைப்பது போலவே பொருளாதார நன்மையும் வேண்டும். நிறைய சம்பாதித்தவர்கள், மன நிறைவுக்காக சமூக சேவை செய்பவர்கள் மட்டும் இதற்கு விதிவிலக்கு.

ஆனால் எதைத் தொழிலாகச் செய்கிறீர்களோ அதில் பொருளாதார நன்மையும் ஓர் அம்சம். பொருளாதார நன்மை கிடைக்காமல் இருப்பது இரண்டு காரணங்களில் நிகழ்ந்திருக்கலாம்.

1. நீங்கள் செய்யும் பணிகள் நல்ல பெயரையும் புகழையும் நோக்கி செய்யப்படும் அளவு பொருளாதார நன்மை தரவில்லை என்றால், அந்த வேலையை அப்படித்தான் – அதன் மூலம் பெரிய அளவில் பொருளாதார நன்மைகள் கிடைக்காது என்று பொருள்.

2. அல்லது, உரிய அளவில் பொருளாதார நன்மைகள் கிடைத்தாலும் அந்த நன்மைகளை சரியாகப் பயன்படுத்தி வளங்களைப் பெருக்கும் வழி உங்களுக்குக் கிடைக்கவில்லை என்று பொருள்.

இதில் முதலாவது காரணம்தான் உங்கள் வாழ்க்கையில் காணப்படும் நடைமுறை உண்மையென்றால், உங்கள் உழைப்புக்கான விலையை நிர்ணயிக்க நீங்கள் தயங்குகிறீர்கள் என்று கருதலாம்.

இது மிகவும் ஆபத்தான அணுகுமுறை, மற்றவர்கள் தவறாகக் கருதுவார்கள் என்று மகத்தான பணிகளை செய்து அதற்குரிய ஊதியத்தைப் பெறவோ, அல்லது நீங்களே உங்கள் ஊதியத்தை நிர்ணயம் செய்து கேட்கவோ தயங்குவது பிற்காலத்தில் விரக்தியிலும் தன்னிரக்கத்திலும் கொண்டுபோய்விடும். எனவே இந்த மனநிலையை உடனடியாக மாற்றிக் கொள்ள வேண்டும்.

இரண்டாவதாக உள்ள காரணம்தான் உங்களைப் பொறுத்தவரை உண்மை என்றால், நிதி ஆதாரங்களை சரிவரக் கையாள்வதில் உங்களுக்குப் பயிற்சியில்லையென்று பொருள். இத்தகைய சூழ்நிலையில் சரியான ஒருவரை நியமித்து உங்கள் நிதி ஆதாரங்களை சீர் செய்ய வேண்டும்.

– மரபின் மைந்தன் ம.முத்தையா

நினைத்தது போலவே வெற்றி என்னும் நூலிலிருந்து…

13-வெற்றி வேண்டுமா? வழிகள் இதோ!!

எதைச் செய்தாலும் வெற்றிக்காகவே செய்கிறோம். ஆனால், எப்படிச் செய்கிறோம் என்பதைப் பொறுத்ததுதான் வெற்றியும் தோல்வியும். செய்கிற வேலைகளும் தொழில்களும் வேறுபடலாம். பொதுவானதாக இருப்பது அணுகுமுறையும், நம்மை ஆயுத்தம் செய்து கொள்கிற விதங்களும்தான். அவற்றில் கவனம் செலுத்துகிற போது வெற்றிக்கான விதை விழுகிறது.

நீங்கள் எதைச் செய்கிறீர்களோ அதை வெற்றிகரமாகச் செய்வது என்பதை நோக்கி நகர நகர சாதனை என்பதே சுலபமான வேலையாகி விடுகிறது.

அணுகுமுறை எதிலிருந்து ஆரம்பிக்கிறது? எண்ணங்களிலிருந்து ஆரம்பிக்கிறது? எந்தப் பின்புலமும் இல்லாமல் தொடங்கி சிலர் அசகாய வெற்றிகளை எட்டியிருக்கிறார்களே, அந்த வெற்றிகள் எதிலிருந்து தொடங்கின தெரியுமா? அவர்களின் அபிப்ராயங்களில் இருந்து!! தாங்கள் வெறுமையான சூழலில் இருந்தாலும் அங்கிருந்து வெற்றியாளர்களாய் வளரமுடியும் என்ற அபிப்ராயம்தான் அவர்களுடைய முதல் உந்து சக்தி. தங்களின் உற்சாகமே அவர்களை உரிய இடத்தில் கொண்டு சேர்க்குமென உறுதியாய் நம்பியவர்கள் அவர்கள்.

அனைத்து வெற்றிகளும் நம் அபிப்ராயங்களில் தான் ஆரம்பமாகின்றன என்பது நாம் அறிய வேண்டிய முதல்பாடம். அந்த அபிப்ராயம் தோன்றுகிற போதே அடுத்தடுத்து அதனை உறுதி செய்து கொள்ளும்விதமாக நடவடிக்கைகளும், ஒழுங்கும் தானாக உருவாகி விடுகிறது. எனவே வெற்றி பெறவேண்டும் என்கிற அபிப்ராயமே முதல்படி.

மனதில் ஏற்படுகிற இந்த அபிப்ராயம் வார்த்தைகளிலும் வெளிப்படத் தொடங்குமென்றால் வெற்றியை நோக்கி இரண்டாவது அடியை எடுத்து வைக்கிறீர்கள் என்று பொருள். பேசினால், புதிதாக ஒன்றைக் கற்றுக்கொள்ள வாய்ப்புக் கிடைத்து என்று நீங்கள் சொல்லத் தொடங்கிவிட்டீர்களா? அப்படியானால் வெற்றிக்கான மனோபாவம் உங்களுக்குள் அரும்பத் தொடங்கிவிட்டதாக அர்த்தம்.

ஏதேனும் ஒன்றை “இதைச் செய்யமுடியாது” என்று சொல்வதைவிட, “வேறு எப்படி செய்யலாம் என்று யோசிக்கலாம்” என்கிற அணுகுமுறை ஏற்படுவதுதான், மனதில் அரும்புகிற உறுதி வார்த்தைகளிலும் வெளிப்படத் தொடங்கியதன் அடையாளம்.

வெற்றியை நெருங்குவதற்கான வழிகளில் உடற்பயிற்சியும் ஒன்று. இது பலருக்கு ஆச்சரியமாக இருக்கும். ஆனால் உடற்பயிற்சி ஆரோக்கியத்திற்கும் எடைகுறைப்பும் மட்டுமல்ல. உடற்பயிற்சி மூலம் வாழ்க்கை இயல்பாக இருப்பதாகவும் – புதிய சக்தி கிடைப்பதாகவும் – நம்பிக்கை அதிகரிப்பதாகவும் – ஆய்வு முடிவுகள் அறிவிக்கின்றன.

வெற்றிபெற விரும்புகிறவர்களுக்கு மிக முக்கியமான இன்னொரு பண்பு, புதிய மனிதர்களையும் புதிய சூழல்களையும் தயக்கமில்லாமல் எதிர் கொள்வது. பக்கத்தில் யாராவது புதிதாகக் குடி வந்தால், அவர்களாக வந்து அறிமுகம் செய்து கொள்ளும்வரை காத்திருக்காமல், நீங்களாகச் சென்று அறிமுகம் செய்து கொள்வதில் தொடங்கி, முற்றிலும் அந்நியமான சூழலில் ஏற்படும் வாய்ப்புகளைக் கூச்சமில்லாமல் எதிர்கொண்டு, அந்த வாய்ப்பைப் பயன்படுத்திக் கொள்வதுவரை எத்தனையோ நிலைகளுக்கு இது பொருந்தும்.

நாம் சற்றும் எதிர்பாராத இடங்களிலிருந்து, எதிர்பாராத வாய்ப்புகள் ஏற்படுவதும், அதன் வழியே நாம் புதிய ஏணிகளில் ஏறுவதும் நிகழ்வதற்கு எல்லா சாத்தியக் கூறுகளும் உள்ளன. எனவே புதிய திசைகள் திறந்து கொள்ள உற்சாகமாகக் காத்திருப்பதும், நமக்குள் இருக்கும் நத்தைக் கட்டை உடைத்துக்கொண்டு நதிபோலப் புறப்படுவதும் வெற்றிக்கு வழிசொல்லும் அம்சங்கள்.

ஒருவர் வெற்றியாளராக உருவெடுக்க நினைக்கிறார் என்றால், மனதுக்குள் சில முன்னோடிகளை அவர் வரித்துக்கொள்கிற வழக்கம். அப்படி வரித்துக்கொள்கிற முன்னோடிகள் நிகரற்ற வெற்றியாளர்களா என்பது முக்கியமல்ல. நிரந்தர வெற்றியாளர்களா என்பதே முக்கியம். கொடிகட்டிப் பறந்து கோலாகலமாய் வளர்ந்து – பிறிதொருநாள், அது குறுக்கு வழியில் கிடைத்த வளர்ச்சி என்று தெரியவரும்போது, அந்த வெற்றியாளர் மீதான அபிப்ராயம் மட்டுமா விழுகிறது? வெற்றி குறித்த நம்பிக்கையின் அடித்தளமே ஆட்டம் காண்கிறது. எனவே சரியான மனிதரை – சரியான காரணங்களுக்காக முன்னோடியாய் வரித்துக் கொண்டு முன்னேறுவது மிகமிக முக்கியம். ஒரு பாதையில் நீங்கள் போகிற போது வாகனத்தை நிறுத்தி வழி கேட்கிறீர்கள். சிலர் சரியாக வழிகாட்டுகிறார்கள். சிலர் குழப்புகிறார்கள். சிலர் அலட்சியமாக நகர்ந்து போய் விடுகிறார்கள். இதற்கிடையே சாலைக்குக் குறுக்கே அவசரக்காரர்களிலிருந்து பயணத்தை நிகழ்த்துவதே, சென்று சேர்கிற இடத்தில் செய்ய வேண்டிய முக்கியமான பணிக்காகத்தான்.

அந்தப் பணியில் இருக்கும்போது, வழியில் நடந்தவற்றை நினைத்துக் கொண்டிருப்பீர்களா என்ன? வாழ்க்கைப் பயணமும் அப்படித்தான். உங்கள் இலக்கை எப்படியாவது சென்றடைய வேண்டுமே தவிர வழியில் வரும் விமர்சனங்களை சின்னச் சின்ன சீண்டல்களை பொருட்படுத்தக் கூடாது.

வெற்றிக்கு மற்றொரு முக்கியமான வழி, பாராட்டு என்றதுமே மற்றவர்கள் பாராட்டும்படி வாழ்வதுதான் முதலில் நம் மனதில் தோன்றும். அதுமட்டும் போதாது. மற்றவர்கள் பாராட்டும் விதமாக வளர்வது போலவே மற்றவர்களைப் பாராட்டும் பண்பையும் வளர்த்துக்கொள்ள வேண்டும். பாராட்டு மட்டும் போதாது. முடிந்த வரை மற்றவர்கள் வெற்றிபெற உதவுவதுகூட உங்கள் வெற்றிகளுக்குத் துணை நிற்கும். உதவி தருபவர்களே உதவி பெறுகிறார்கள் என்பது பொது விதி. எப்போதோ விதைத்த விதை எத்தனையோ பழங்களைத் தருவதுமாதிரி, எப்போதோ செய்கிற உதவி நிகரற்ற நன்மைகளாகத் திரும்பவரும்.

உள்ளத்தில் ஏற்படும் அபிப்ராயம், உங்களிடம் வெளிப்படும் வார்த்தைகள், உடற்பயிற்சி, அறியாத இடங்களிலும் ஆளுமையுடன் அணுகுதல், உண்மையான வெற்றியாளர்களைப் பின்பற்றுதல், முக்கிய இலக்கில் மட்டும் கவனம் செலுத்துதல், மற்றவர்களைப் பாராட்டி, உரிய உதவிகள் புரிதல். இத்தனை பண்புகளும் எப்போது உங்களிடம் ஜொலிக்கிறதோ, நீங்கள் ஜெயிக்கப் போவது நிச்சயம்!

– மரபின் மைந்தன் ம.முத்தையா

நினைத்தது போலவே வெற்றி என்னும் நூலிலிருந்து…