இலவச இணைப்பா இதயங்கள்?

வாழ்வில் போராடுங்கள்! வாழ்க்கையுடன் அல்ல… புத்தகத்திலிருந்து…

திறமையாளர்களில் தொடங்கி உறவினர்கள் வரை, பணியாளர்களில் தொடங்கி பழகுபவர்கள் வரை, எல்லோரையும் பயன்படும் பொருளாக மட்டுமே பார்க்கிற பழக்கம் பெருகி வருகிறது.

ஒரு மனிதனுடைய வாழ்வில் விலைமதிக்கவே முடியாத முதலீடும், அசையாச் சொத்தும், அவன் உருவாக்கி வைக்கக் கூடிய உறவுகள் மட்டுமே.

உங்கள் வங்கி கணக்கை, நிலத்தின் மதிப்பை நகைகளின் எடையை கணக்கிட்டு விட முடியும். ஆனால் நீங்கள் உருவாக்கி வைத்திருக்கும் உறவுகள், எந்த நேரத்திலும் எந்த உதவியை எப்படி செய்யும் என்பதை யாராலும் அளவிட முடியாது.

பல இலட்சம் ரூபாய்கள் செலவு செய்து நிறைவேற்றமுடியாத காரியத்தை நிறைந்த அன்பால், நட்பால் சில சமயம் நிறைவேற்றிவிட முடியும்.

நாம் சிலரிடமோ, நம்மிடம் சிலரோ வணிக ரீதியாகவே பழகினால் கூட அவர்களை முக்கியமான மனிதர்களாய் மதிப்பதே உறவுகளை பலப்படுத்தும்.

மனிதர்கள் நமக்கு ஆதாயம் கொடுக்கவே உருவாக்கப்பட்ட தசைப்பிண்டங்கள் என்றும் இதயம் என்பது அவர்களுக்கு இலவச இணைப்பென்றும் எண்ணுவது உறவுகளை ஒரு போதும் பலப்படுத்தாது.

வெளியே உலவுங்கள்! வாழ்க்கை எதிர்ப்படலாம்

வாழ்வில் போராடுங்கள்! வாழ்க்கையுடன் அல்ல… புத்தகத்திலிருந்து…

படிப்பறிவு என்பது அடுத்தவர்கள் எழுதி வைத்த அனுபவங்களை எடைபோட உதவும். பட்டறிவு என்பதோ உங்கள் சொந்த அனுபவங்களைப் புடம்போட உதவும்.

பழைய காலங்களில் ஒருவருக்கு சந்நியாசம் தரும் முன் காசியிலிருந்து ராமேஸ்வரம் வரை தீர்த்த யாத்திரை போகச் சொன்னதன் நோக்கமே வாழ்க்கை அனுபவங்களை விரிவாக்கிக் கொள்ளத்தான்.

ஓரளவு சாதித்த பிறகு பெரும்பாலானவர்கள் தங்களை மற்றவர்களிடமிருந்து துண்டித்துக் கொள்கிறார்கள்.

கால்கள் முளைத்த தீவாக நடமாடுவதன் மூலம் ஒரு மனிதன் தன் உலகத்தைத்தானே சுருக்கிக் கொள்கிறான்.

சாதித்திருந்தாலும், சலிப்பாக, சிரிப்பே இல்லாமல் வெறுப்பாக சிலர் நடமாடுவதன் காரணம் இதுதான்.

மிக எளிய மனிதர்கள் கூட வாழ்வின் மிக உயர்ந்த பாடங்களை உணர்த்தி வருகின்றார்கள். அவர்களை சந்தித்தால் உலக ஞானத்தை சந்திக்கலாம்.

நீங்கள் எறிந்த வீணைகள்

வாழ்வில் போராடுங்கள்! வாழ்க்கையுடன் அல்ல… புத்தகத்திலிருந்து…

கைக்குக் கிட்டிய இரும்பு மரத்துண்டு, கம்பிகள் ஆகியவற்றைக் கொண்டு இசைக்கருவி செய்த இளைஞன் ஒருவனைப் பற்றிய கதை ஒன்றுண்டு.

குப்பைகளில் கிடந்தவற்றை வைத்து இசைக்கருவி செய்தான் அந்த இளைஞன் என்பதுதான் செய்தியின் சாரம்.

ஆனால் சுகமான இசை தரும் நல்ல நல்ல வீணைகளை நலங்கெடப் புழுதியில் எறிவதுபோல் பல நல்ல விஷயங்களை நாம் தொலைத்திருப்போம்.

உடல் நலம், சிறந்த உறவுகள், நல்லவர் நட்பு, என்று பலவற்றை அஜாக்கிரதையால் தொலைந்திருந்தால், விழித்துக் கொள்ள இதுவே நேரம்.

வீசியவற்றைதேடி எடுக்க வாழ்க்கை வழங்கும் வாய்ப்புகளை அகங்காரத்தாலோ, அலட்சியத்தாலோ தவறிவிடக் கூடாது.

சின்ன மனத்தாங்கலில் சிறந்த நண்பர்களையோ உறவினர்களையோ பகைத்துக் கொண்டிருந்தால் அவர்களிடம் வலியச் சென்று பேசி, சரி செய்து கொள்ளலாம்.

சோம்பேறித்தனத்தால் உடல் பயிற்சியைச் கைவிட்டிருந்தால், உடனே தொடங்கலாம். இதயத்தில் பெருகும் இனிய இசைக்கு ஈடேது? இணையேது?…

ஓய்வை இழப்பவர்கள் உலகை இழப்பார்கள்!

வாழ்வில் போராடுங்கள்! வாழ்க்கையுடன் அல்ல… புத்தகத்திலிருந்து…

ஓய்வு என்றால் உறங்குவது மட்டுமல்ல புலன்கள் இளைப்பாறி புத்துணர்வு கொள்வது. ஊருக்கு வெளியே இயற்கையின் மடியிலோ பரந்து விரிந்த புல்வெளியிலோ கொஞ்ச நேரம் நல்ல இசை கேட்பதோ கூட ஓய்வுதான்.

வாழ்க்கை பல நேரங்களில் பரபரப்பான ஓட்டத்தை மேற்கொள்ளச் செய்து உங்களை உந்தித்தள்ளுகிறது. அப்போதே நீங்கள் காட்டுகிற நிதானம் உங்களுக்கு நிறைந்த புத்துணர்வை பரிசாகத் தருகிறது.

நீங்கள் சக்தியை சேமிக்கும் விதமாய் எதை விரும்பிச் செய்தாலும் ஓய்வுதான்.

புத்தகம் படிப்பது புத்துணர்வு தரும் பழக்கம். இதமான இசை கேட்பது இதயத்திற்கு அமைதி தரும் ஓய்வு. பாலய கால நண்பர்களுடன் பேசிச் சிரிப்பது, வாழ்வின் வசந்தங்களை மீட்டுத் தருகிறஓய்வு.

இந்த ஓய்வுக்கு நீங்கள் தயாராகிற போது உங்கள் வாழ்க்கை முறையை மிகவும் ஆக்கபூர்வமாய் நடத்திச் செல்கிறீர்கள்.

உங்களை இந்த உலகின் அதிர்வுகளோடும் இயக்கத்தோடும் இணைந்து தினம் தினம் புதுப்பிக்கிறது ஓய்வு. ஓய்வின் ஒவ்வொரு நொடியிலும் உங்கள் உடல் நலமாக வேண்டும். உள்ளம் வளமாக வேண்டும்.

தபால்போட்டு வருவதல்ல தூக்கம்

வாழ்வில் போராடுங்கள்! வாழ்க்கையுடன் அல்ல… புத்தகத்திலிருந்து…

உடம்புக்குள் ஓடுகிற கடிகாரத்தின் ஓட்டத்தை சரிபார்க்க, சரியான வழி, தூக்கம். மாத்திரை போட்டு, தபால் போட்டு, தூக்கத்தை வரவழைத்தால் உடம்பு நம் வசம் இல்லை என்று பொருள்.

சரியான உணவு, சீரான உடற்பயிற்சி ஆகியவற்றுடன் பதட்டமில்லாத, பக்குவமான வாழ்க்கை வேண்டிய அளவு தூக்கத்தை பெற்றுத்தரும்.

சில நிமிட மதியம் உறக்கம். மகத்தான சுறுசுறுப்பை பெற்றுத் தரும் என்கிறார்கள். உண்மைதான். இரவு குறைந்தது ஏழு மணி நேரத் தூக்கமேனும் இருப்பது ஆரோக்கியத்தின் அடையாளம்.

கண்ணுறக்கம் கொள்ளாமல் உழைக்கும் செயல் வீரர் என்பதெல்லாம் அலங்காரச் சொற்களுக்குப் பொருந்துமே தவிர ஆரோக்கியத்திற்கு சரிவராது.

காலையும் மாலையும் உடற்பயிற்சிக்கு நேரம் ஒதுக்குவது, நடுத்தர வயதக்குள் நுழையும் பொழுதே பழக வேண்டிய பழக்கம்.

இரவில் மிதமாக உணவை உண்ணுவதும், உண்டபின்னர் சிறிது நேரம் குறுநடை பயில்வதும் மனதையும் வயிற்றையும் கனமின்றி வைத்துக் கொள்வதும், பழகிவிட்டால் தூக்கம் வரும். ஆரோக்கியமும் வரும்.

எத்தனை பழங்கள் திருடினீர்கள்?

வாழ்வில் போராடுங்கள்! வாழ்க்கையுடன் அல்ல… புத்தகத்திலிருந்து…

இருக்க இருக்க இறுக்கம் கூடுவதுதான் வாழ்க்கை என்பது சிலருடைய விசித்திரமான கணக்கு. தங்கள் குழந்தைப் பருவத்தில் விடலை வயதில் நடந்த விஷயங்களைக் கூட விகல்ப்பமில்லாமல் பகிர்ந்து கொள்ளத் தயங்குவார்கள்.

பள்ளிக்கு புத்தனாகவே போய் கல்லூரியில் காந்தியாகவே வாழ்ந்தது போல் காட்ட நினைப்பதுண்டு. ஆனால், சின்ன வயதுக்கு குறும்புகளையும் சேட்டைகளையும் இதயத்தில் வைத்திருப்பவர்களே இளமையாய் இருப்பார்கள்.

அறியாத வயதின் அசகாயக் குறும்புகளுக்கு பெற்ற தண்டனைகள் கூட முன்னே கசக்கும், பின்னே இனிக்கும்.

உங்கள் பள்ளிப் பருவத் தோழர்களைத் தேடிப் பிடியுங்கள். பழைய கதைகளைப் பேசிச் சிரியுங்கள். இன்னும் இன்னும் இளமையாய் உணர்வீர்கள்.

பள்ளி வயதில் பேச மறுத்து சண்டை போட்ட நண்பனுடன், அவன் அடித்த காயத்தின் தழும்பைக் காட்டி வாய்விட்டுச் சிரிப்பது வாழ்வின் அர்த்தத்தையே புத்தம் புதிதாகக் காட்டும்.

எத்தனை மரங்களில் ஏறினீர்கள், எத்தனை கனிகளை திருடினீர்கள், என்பதையெல்லாம் உங்கள் சாதனைப் பட்டியலில் சேர்த்துக் கொள்ளுங்கள். ஏனெனில் ஆகப் பெரிய சாதனையே. சந்தோஷமாக இருப்பதுதான்.

நம்மை உண்ணவா உணவு?

வாழ்வில் போராடுங்கள்! வாழ்க்கையுடன் அல்ல… புத்தகத்திலிருந்து…

சுவைக்காக உண்ணுவது ஒரு வயது, சுவைக்காத உணவையும் அதன் தன்மைக்காக உண்ணத் தொடங்க வேண்டியது நடுத்தர வயது. தொடக்கத்தில் சிரமமாய் இருந்தாலும் உண்ண உண்ண அதன் அசல் சுவை பிடிபடும்.

ஒவ்வொருவர் உடல் நிலைக்கும் வாழ்க்கை முறைக்கும் ஏற்றவாறு உணவு முறைகளில் மாறுதல் செய்வது அவசியம்.

பச்சைக் காய்கறிகள், நார்சத்துக்கான உணவு, ஒரு மணிநேர இடைவெளியில் தண்ணீர் என்று சில நல்ல பழக்கங்களைப் பழகிக் கொள்வது மிகவும் அவசியம்.

உணவு என்பது நம் ஓட்டத்திற்காக எரிபொருள் ஆக வேண்டுமே தவிர நாம் சுமந்து செல்ல வேண்டிய பாரமாய் மாறிவிடக் கூடாது.

நாம் உண்ணுகிறஉணவு நம்மை உண்டுவிடக்கூடாது. அஃறிணைகள் என்று நாம் அழைக்கிற உயிரினங்கள் தங்களுக்கேற்ற உணவை உள்ளுணர்வால் தேர்வு செய்கின்றன.

மனிதனுக்கும் உள்ளுணர்வு உண்டு. அதனை அலட்சியத்தால் மழுங்கடித்து விட்டதால் இப்போது விழிப்புணர்வு பிரச்சாரங்கள் நடக்கின்றன.

உணவை நீங்கள் உண்ணுங்கள்
உணவுக்கு உணவாகாதீர்கள்.

தானடங்காதவர்களின் தன்னடக்கம்… தாங்க முடியலைடா சாமி!

வாழ்வில் போராடுங்கள்! வாழ்க்கையுடன் அல்ல… புத்தகத்திலிருந்து…

ஆணவத்துடன் இருப்பவர்களைக் கூட ஒருவகையில் சகித்துக் கொள்ள முடியும். அடக்கத்துடன் இருப்பதைப்போல பாவனை புரிபவர்களின் போலித்தனம் பொறுக்கவே முடியாது.

“பெருக்கத்து வேண்டும் பணிவு” என்றார் திருவள்ளுவர். ஒரு மனிதனிடம் எதுவுமே இல்லையென்றாலும் உண்மையான பணிவு இருந்தால் எல்லாமே வந்துவிடும். அதே நேரம் ஒருவர் பணிவு காட்டுவதில் போலித்தனம் காட்டினால் அவர் எவ்விதத்திலும் நம்பகமானவர் அல்ல.

“இவ்வளவு பெரிய மனிதர் பணிவாக இருக்கிறாரே” என்று பெயர் வாங்க சிலர் அடக்கமாய் இருப்பது போல் நடிப்பதும், அந்த வேளையில் அவர்களின் அகங்காரம் துருத்திக் கொண்டிருப்பதும் மிகவும் அசிங்கமாகவும் ஆபாசமாகவும் இருக்கும்.

அன்பு, பரிவு, பணிவு இவற்றைஉள்ளே உணர்ந்து வெளிப்படுத்துங்கள். உங்கள் மீதான நம்பிக்கை பலமடங்கு பெருகுவதை உணர்வீர்கள்.

எங்கள் எஜமானர் ஜாக்கிரதை -ஜிம்மி, -டைகர்

வாழ்வில் போராடுங்கள்! வாழ்க்கையுடன் அல்ல… புத்தகத்திலிருந்து…

வீடுகளில் செல்லப்பிராணிகள் வளர்ப்பதன் நோக்கமே, அவற்றின் நிபந்தனையில்லாத நேசத்தை, நல்ல உணர்வுகளை, நம்பிக்கையை நன்றியை, நாம் கற்க வேண்டும் என்பதற்காகத்தான்.

உயிர்களிடையே பேதம் பார்க்காத பரந்த மனம் வளர்வது, செடிகள் வளர்ப்பதில் தொடங்கி, மீன்கள் வளர்ப்பது, செல்லப் பிராணிகள் வளர்ப்பது என்று படிப்படியாக நீளும்.

மேலும் பரிவும் கனிவும் நிரம்பிய உள்ளம் உருவாக வழி மற்றஉயிர்களுடன் தொடர்பு படுத்திக் கொள்வதுதான்.

ஆனால் எவ்வளவு செல்ல பிராணிகள் சுற்றி இருந்தாலும் தங்கள் தன்மையில் மாறாமல் இருப்பவர்கள், அநேகமாக அந்தப் பிராணிகளை தாவரங்களை ஏறெடுத்தும் பார்க்காதவர்கள் என்று புரிந்து கொள்ளலாம்.

எளிய உயிர்கள் கூட பெரிய விஷயங்களை நமக்கு உணர்த்தி வரும். அப்படி உணர்த்தியும் உணராதவர்கள் வீட்டு வாயில்கலில் மேற்கண்ட அறிவிப்புப் பலகை தொங்கினாலும் ஆச்சர்யம் ஏதுமில்லை.