வாழ்க்கையென்ன வாழ்ந்து பார்க்கலாம்!-19

என்ன பெயர் வைக்கலாம்?
குழந்தை பிறக்கவில்லை என்று கோவில் கோவிலாக ஏறி இறங்குபவர்கள், குழந்தை பிறந்தவுடன் “என்ன பெயர் வைக்கலாம்” என்று ஒவ்வொரு ஜோதிடர் வீடாக ஏறி இறங்குகிறார்கள். நட்சத்திரத்தின்படி, நியூமராலஜியின்படி, நேமாலஜியின்படி என்று எல்லாம் பார்ப்பதால்தான் படிப்படியாக ஏறி இறங்க வேண்டி வருகிறது. சிலர் வம்பே வேண்டாம் என்று குலதெய்வத்தின் பெயரையோ, பெற்றோர் பெயரையோ வைக்க முடிவெடுத்து விடுகிறார்கள்.

அதிலேயும் சில குடும்பங்களில் சிக்கல் வருவதுண்டு. மாமனார், மாமியாருடன் மனத்தாங்கல் உள்ள மருமகனோ, மருமகளோ குழந்தைக்கு அவர்கள் பெயரை வைப்பதில் அதிக ஆர்வம் காட்டுவதுண்டு. குழந்தை பெயரை சாக்காக வைத்து நேராகவே திட்டலாம் என்றுதான்.

இன்னும் சில குடும்பங்களில் இன்னொருவிதமான சிக்கலும் எழுவதுண்டு. பிறந்த ஆண் குழந்தைக்கு யார் பெயரை வைப்பது என்று கணவனுக்கும், மனைவிக்கும் வாக்குவாதம். தன்னுடைய தந்தை பெயரைத்தான் வைக்க வேண்டும் என்று கணவன் பிடிவாதம் பிடித்தான். “இல்லையில்லை. எங்க அப்பா பேர்தான் வைக்கணும்” என்று மனைவி அடம்பிடித்தாள்.

விவகாரம் முற்றி வீதிக்கு வந்தது. அடுத்த வீட்டுக்காரர் பஞ்சாயத்துக்கு வந்தார். விவரம் கேட்டார். “இதுக்குப்போயா சண்டை போடறீங்க?” என்றவர், கணவன் பக்கம் திரும்பிக் கேட்டார். “உங்க அப்பா பேர் என்ன சார்?” “சிவலிங்கமுங்க-!” மனைவி பக்கம் திரும்பிக் கேட்டார். “உங்க அப்பா பேர் என்னம்மா?” “ராமச்சந்திரனுங்க!”

“இவ்வளவுதானே! சிவராமகிருஷ்ணன்னு பேர் வைச்சுடுங்க!” தீர்ப்பு சொல்லிவிட்டுப் போய்விட்டார். இருவருக்குமே சந்தோஷம். திடீரென்று கணவனுக்கு ஒரு சந்தேகம். பக்கத்து வீட்டுக்காரரிடமே கேட்டார். “ஏன் சார்! சிவலிங்கம் எங்க அப்பா பேரு! ராமச்சந்திரன் அவங்க அப்பா பேரு! சிவராமன் வரைக்கும் சரி, கிருஷ்ணன்ங்கிறது யாரு?”

உடனே பக்கத்துவீட்டுக்காரர் சொன்னார். “அது எங்க அப்பா பேரு!” பேர் வைப்பதில் பிறர் யோசனை கேட்டால் இப்படியெல்லாம் சில விபரீதங்கள் வருவதுண்டு.

சில தீவிரமான தொண்டர்கள், தங்கள் தலைவர்களின் பெயர்களை வைப்பார்கள். இன்னும் சிலபேர், தாங்கள் பெற்ற பிள்ளையைத் தூக்கிக்கொண்டு போய் தலைவர்களையே பெயர் வைக்கச் சொல்லி அதற்காக, தட்சணையும் வைப்பார்கள்.

இப்போதெல்லாம் பலரும், ஃபேஷன் கருதி, வாயில் நுழையாத பெயர்களை வைக்கிறார்கள். அந்தப் பெயருக்கு என்ன அர்த்தமென்பது பெற்றோர்க்கும் தெரியாது. பிள்ளைகளுக்கும் தெரியாது.

கம்பீரமான பெயர்களை வைப்பதும், கம்பீரமாகப் பிள்ளைகளை வளர்ப்பதும் மிகவும் முக்கியம். பெயர்களுக்கென்று சில அதிர்வுகள் உண்டு.

நாளன்றுக்கு, அந்தப் பெயரை பத்துப்பேர் அழைக்கிறார்களா? பத்து லட்சம் பேர் அழைக்கிறார்களா என்பது முக்கியமில்லையா?

நேர்மறையான அதிர்வுகள் கொண்ட பெயர்களை வைப்பது மட்டுமே முக்கியமில்லை. அத்தகைய பெயர்களை வாழ்க்கையில் பயன்படுத்துவதும் முக்கியம். சில குடும்பங்களில் மகளுக்கு, “லட்சுமி” என்று பெயர் வைக்கத் தயங்குவார்கள். திருமணம் செய்து கொடுத்தால் “லட்சுமி” வெளியேறிவிடுவதாக அஞ்சுவதுதான் காரணம்.

நபிகள் நாயகம், பெயர்களுக்கான அர்த்தத்தில் மிகவும் அக்கறை காட்டுவார். ஒரு நண்பரை ஆட்டுப் பால் கறக்கச் சொன்னவர், யோசித்துவிட்டு, “நீ கறக்க வேண்டாம்” என்றாராம். ஏனெனில், அந்த நண்பரின் பெயர், “முர்ரா.” “முர்ரா” என்றால் கசப்பு என்று அர்த்தம். பிறகு “யஈஷ்’’ என்ற நண்பரைப் பால் கறக்கப் பணித்தாராம் நபிகள். “யஈஷ்” என்றால் “வாழ்பவர்” என்று அர்த்தம்.

“செல்வம்” என்ற பெயருள்ள பிள்ளைகளைத் தேடி நண்பர்கள் வருவார்கள். “செல்வம் எங்கே” என்று கேட்டால், “செல்வம் இல்லை” என்று பதில் சொல்லக்கூடாது. “இப்ப வந்துடுவார்” என்று சொல்லவேண்டும். இவையெல்லாம் சில நம்பிக்கைகள்தான்.

பேர் சொல்லும் பிள்ளைகளாய், பேரெடுக்கும் பிள்ளைகளாய் வளர்ப்பதுதான் முக்கியம். பேர் கெடுக்கும் விதமாய் பிள்ளைகளை வளர்த்தால் என்ன பெயர் வைத்தும் பயனில்லை.

பிள்ளைகளின் நல்வாழ்வு பெயரிலிருந்து தொடங்குகிறது. நன்கு யோசித்து, நல்ல அர்த்தமும் நல்ல அதிர்வுகளும் கொண்ட பெயர்களையே பிள்ளைகளுக்குச் சூட்டுங்கள்.

(மரபின்மைந்தன் முத்தையா எழுதிய வாழ்க்கையென்ன வாழ்ந்து பார்க்கலாம் என்னும் புத்தகத்தில் இருந்து)

வாழ்க்கையென்ன வாழ்ந்து பார்க்கலாம்!-18

காலம் ஒரு காமிரா
“ஸ்மைல் ப்ளீஸ்”

“வாழ்க்கையும் புகைப்படக் கலையும் ஒன்றுதான்” என்று யாரோ, எங்கோ சொன்னார்கள். என்ன காரணமாம்? புகைப்படத்தில் முதலில் கிடைப்பது நெகடிவ். அதையே டெவலப் செய்கிறார்கள். எதிர்மறையான விஷயங்களை நமக்குச் சாதகமாக “டெவலப்” செய்து கொள்வதில்தான் வெற்றி இருக்கிறது. எனவே புகைப்படக்கலை வாழ்க்கை இரண்டும் ஒன்றுதானாம்.

யோசித்துப் பார்த்தால் புகைப்படக்கலைக்கும் வாழ்க்கைக்கும் இன்னும் பல பொருத்தங்கள் இருக்கத்தான் செய்கின்றன. புகைப்படம் சரியாக அமைவதற்கு காமிராவின் கோணம் மிக முக்கியம்.

எந்தக் கோணத்தில் காமிரா வைக்கப்படுகிறதோ, அந்தக் கோணத்தில்தான் காட்சி பதிவாகும்.

வாழ்க்கைகூட அப்படித்தான் ஒன்றைச் சரியான கோணத்தில் நாம் காணும்போதுதான் தெளிவான துல்லியமான காட்சி கிடைக்கிறது. தவறான கோணத்தில் அணுகும்போது காட்சிக் குழப்பம் ஏற்படுகிறது.

இரண்டாவது அம்சம், வெளிச்சம். இயற்கையான வெளிச்சம் இல்லாதபோது, செயற்கை வெளிச்சத்தை அமைத்துக்கொள்வதுபோல, வாய்ப்புகள் இயல்பாக அமையாவிட்டாலும் தேடிப்போய் வாய்ப்புகளை ஏற்படுத்திக் கொள்வதுதான் வெற்றியாளனின் இயல்பு. இருக்கிற வெளிச்சம் போதுமென்று அவசரமாய்ப் புகைப்படம் எடுத்தால், மங்கலான படம்தான் கிடைக்கும்.
அதுபோல், “இருப்பதே போதும்” என்று சமாதானம் ஆகிவிடுகிற மனிதனுக்கு சாதனைகள் சாத்தியமில்லை. ஒரு விநாடியின் பதிவுக்காக எத்தனை மணி நேரங்களை முன்கூட்டியே திட்டமிட்டு ஏற்பாடு செய்கிறார் புகைப்படக் கலைஞர்.

வெற்றி என்பதுகூட ஒரு விநாடி நேர சம்பவம்தான். அதற்கு முன் திட்டமிடுவதில்தான் சாதனை மலர்கிறது.

மூன்றாவது அம்சம், ‘பளிச்’சென மின்னும் ஃப்ளாஷ். இதனை மனிதனின் உள்ளுணர்வுக்கு ஒப்பிடலாம். ஒரு செயலைச் செய்ய எத்தனிக்கும்போது ‘பளிச்’சென்று மனதுக்குள் மின்னும் வெளிச்சத்தால் அந்தச் செயலுக்கே புதிய பொலிவு கிடைக்கிறது.

அதைவிடவும் முக்கியம், எப்போது ‘கிளிக்’ செய்கிறோம் என்பது. ஒரு குழந்தையைப் புகைப்படம் எடுக்க முற்படுகிறோம் என்று வைத்துக்கொள்ளுங்கள். அது, எப்போது, என்ன செய்யும் என்று யாருக்கும் தெரியாது. கலவரமாக எல்லோரையும் சுற்றிச்சுற்றி பார்க்கும். ஆங்காங்கே வைக்கப்பட்டிருக்கும் புகைப்படக் கருவிகள் அதன் பார்வையில் புதுமையாகத் தெரியும். அப்போது அதன் கண்களில் சின்னதாய் ஒரு மின்னல். அப்படியே திரும்பி அம்மாவைத் தேடும். காணாத கவலையில் உதடு பிதுக்கும். உடனே அம்மா குரல் கொடுத்ததும் குரல் வந்த திசை நோக்கிப் ‘பளிச்’சென்று சிரிக்கும்.

அந்தக் கவிதை நிமிஷங்களுக்காகக் காத்திருந்தால் காமிரா ஒரு காவியத்தை வடித்தெடுக்கும்.

வாழ்க்கையும் ஒரு குழந்தை போலத்தான்! எப்போது என்ன செய்யும்? யாருக்கும் தெரியாது. அதன் சாதகமான நேரததிற்காகக் காத்திருந்து, ‘சட்’டென்று செயல்படும்போது தான் செயல் சிறக்கிறது.
எடுத்த புகைப்படங்களிலேயே மிக அழகானதை லேமினேட் செய்து வைப்பது மாதிரி, நம் திறமைகளிலேயே மிகச் சிறந்த திறனை பராமரித்து, பலரும் பார்க்கும்விதமாய் வெளிப்படுத்த வேண்டும்.

இப்படி வாழ்க்கை அமையுமென்று சொன்னால் காமிரா முன்னால் மட்டுமல்ல… காலம் முழுவதுமேகூட, யாரும் ‘ஸ்மைல் ப்ளீஸ்’ சொல்லாமலேயே நம் இதழ்களில் புன்னகை இருந்து கொண்டேயிருக்கும்.

(மரபின்மைந்தன் முத்தையா எழுதிய வாழ்க்கையென்ன வாழ்ந்து பார்க்கலாம் என்னும் புத்தகத்தில் இருந்து)

வாழ்க்கையென்ன வாழ்ந்து பார்க்கலாம்!-17

நீங்களும்தான் வசீகரிக்கிறீர்கள்!
மற்றவர்களை வசீகரிப்பவர்கள்தான் மக்கள் தலைவர்களாக உயர முடியும் என்பது பொதுவான கருத்து. உண்மையில், ஒவ்வொருவரிடமும் வசீகரிக்கிற ஆற்றல் இருக்கத்தான் செய்கிறது. ஒரு சராசரி மனிதர்கூட குறைந்தது நான்கு பேரையாவது வசீகரித்திருப்பார்.

வசீகரம் என்பது மாயமோ மன வசியமோ அல்ல. இன்னொரு மனிதர்பால் உங்களுக்கிருக்கும் நல்லெண்ணம். ஒரு மனிதரின் நலனை நீங்கள் விரும்பினால் அந்த மனிதர் அவரையும் அறியாமல் உங்கள் பால் ஈர்க்கப்படுகிறார்.

வீடுவீடாக ஏறியிறங்கும் பல விற்பனைப் பிரதிநிதிகளிடம் வீட்டில் இருக்கும் சிலர், விரட்டியடிக்காத குறையாக எரிந்துவிழுவார்கள். ஆனால், ஒரு சில பிரதிநிதிகளை மட்டுமே உள்ளே அழைத்துப் பேசுவார்கள்.

அந்தப் பிரதிநிதியிடம் இருக்கிற வசீகரத்தன்மைதான் அதற்குக் காரணம்.

இந்த வசீகரத் தன்மை வளர முதல் தேவை, சுய மதிப்பீடு. உங்களை நீங்களே மதிப்பிட்டு, உங்கள் பணியில் காதலாகி ஈடுபட்டு, உயர்ந்த அபிப்பிராயத்தை ஏற்படுத்திக் கொள்வது.

இரண்டாவதாக, ஒரு வாடிக்கையாளருக்கு நீங்கள் அனுப்பும் அதிர்வுகள் அதன் அலைகளின் வீரியத்தைப் பொறுத்தே காரியம் அமையும். அவரைப் பயன்படுத்திக் கொள்ளலாம் என்கிற எண்ணம் உங்களுக்குள் எழுந்தால், அவர் எச்சரிக்கையாகிவிடுகிறார். மாறாக, அவருக்கு உதவலாம் என்று உண்மையாகவே கருதினால் உங்களிடம் அவர் நேசக்கரம் நீட்டுகிறார்.

வசீகரிப்பதற்குத் தோற்றமோ, பதவியோ முக்கியம் இல்லை. மனநிலைதான் முக்கியம்.

ஒவ்வொருவரிடமும் யாராவது ஈர்க்கப்படுவார்கள். அந்த ஈர்ப்பின் அம்சத்தை விரிவுபடுத்தும்போதுதான் உங்கள் பலம் உங்களுக்கே தெரியும். “அகத்தின் அழகே அழகு” என்று பெரியவர்கள் இதைத்தான் சொன்னார்கள்.

விழிப்புணர்வோடு உங்கள் மன உணர்வுகளைக் கண்காணித்து ஒழுங்குபடுத்தி வந்தாலே போதும். உங்கள் வசீகரம் கூடுவதை நீங்களே உணர்வீர்கள்!

(மரபின்மைந்தன் முத்தையா எழுதிய வாழ்க்கையென்ன வாழ்ந்து பார்க்கலாம் என்னும் புத்தகத்தில் இருந்து)

வாழ்க்கையென்ன வாழ்ந்து பார்க்கலாம்!-16

எழுச்சிப் பயணத்திற்கு எரிபொருள் உள்ளதா?
இரு சக்கர வாகனம் ஒன்றுக்கான சமீபத்திய விளம்பரம் ஒன்று. பெட்ரோல் பங்கில் வந்து வாகனத்தை நிறுத்திவிட்டு, “அது குடுப்பா” என்பார். “எதை” என்பார் பெட்ரோல் பங்க்காரர். அதாவது, எரிபொருளையே மறந்துவிடும் அளவுக்கு எரிபொருள் சேமிக்க இந்த இரு சக்கர வாகனம் கை கொடுக்கிறதாம்.

உண்மையில், வாழ்க்கை என்கிற பயணத்தில் வேகமாகவும் தடையில்லாமலும் செல்ல எது நமக்கு எரிபொருள்? எண்ணங்கள்தான்! எண்ணங்கள் என்கிற எரிபொருளில் கலப்படம் இல்லாமல் இருந்தால்தான் இலட்சியத்தைத் தொடும் வேகத்தோடு வாழ்க்கை வாகனம் ஓடும்.

பல பேரும் வாழ்க்கையில் எட்ட வேண்டிய இலட்சியத்தை எட்டாததற்கு என்ன காரணம்? செயலுக்குத் தரும் முக்கியத்துவத்தை எண்ணங்களுக்குத் தராததுதான். யோசிக்காமல் செயல்பட்டுவிட்டு, செயல்பட்டதைப் பற்றியே யோசிப்பதால் எந்தப் பயனும் ஏற்படப்போவதில்லை.

எமர்சன் சொன்னார், “எல்லாச் செயல்களுக்கும் காரணம் மூதாதையர் எண்ணங்கள் தான்” என்று. நம்மில் பலர், எண்ணிய வேகத்திலேயே செய்துமுடிக்க நினைத்து அவசரப்படுகிறோம். அதனால் என்னாகிறது? எண்ணம் வலிமையாக வேரூன்றாமலேயே செயல்வடிவத்திற்கு வருகிறது.

நல்ல எண்ணங்களால் மனதை நிரப்பிக் கொள்ளுங்கள் என்று எல்லோரும் சொல்வார்கள். அதற்கென்று வலிமையான வழிமுறை ஒன்றும் இருக்கிறது.

காலை விழித்தெழுந்தவுடன் உங்களுக்கு நீங்களே உற்சாகம் கொடுங்கள். எப்படியெல்லாம் உற்சாகமாக இருக்கப்போகிறீர்கள் என்றும், எத்தகைய வெற்றிகளை எட்டப் போகிறீர்கள் என்றும் உங்களுக்கு நீங்களே சொல்லுங்கள்.

1. இன்று புதிய வாடிக்கையாளர்களை சந்திப்பேன். புதிய ஒப்பந்தங்களை நிச்சயம் பெறுவேன்.

2. இன்று சிக்கலான அலுவல்களையெல்லாம் மிக எளிதில் முடிப்பேன்.

3. பழைய வாடிக்கையாளர்களுக்குச் சிறந்த சேவை தந்து அவர்களுடனான உறவைப் புதுப்பிப்பேன்.
இதற்காக 5 நிமிடங்களை செலவழியுங்கள். அதேபோல இரவு உறங்கப்போவதற்கு முன் அந்த நாளில் பெருமை கொள்ளும்படியாக நீங்கள் செய்துமுடித்த செயல்களை எல்லாம் உங்களுக்கு நீங்களே சொல்லுங்கள். அப்போது தோன்றும் மெல்லிய உற்சாகத்தை உங்கள் மனதுக்குப் பரிசாகக் கொடுங்கள். உதாரணமாக,
1. இன்று பேரம் பேசி என் நிறுவனத்திற்கு நல்ல ஆதாயம் ஈட்டினேன்.
2. இன்று வாடிக்கையாளர்களிடம் பொறுமையாகவும், திறமையாகவும் பேசி அவர்களின் நல்லெண்ணத்தைப் பெற்றேன்.
3. என்னிடம் உதவிகேட்டு வந்தவர்களிடம் பரிவோடு நடந்துகொண்டேன்.

அந்தந்த நாளில் நடைபெற்ற முக்கியமான சம்பவங்களை இப்படி நினைவூட்டிக் கொள்ளலாம்.

இதற்கும் ஐந்து நிமிடங்கள் போதும். ஒவ்வொரு விடியலும் உற்சாகத்தோடு தொடங்கும்.

ஒவ்வொரு விண்மீனும் உற்சாகத்தோடு முளைக்கும். சில நாட்களில், எதுவுமே சரியாக நடப்பதில்லை. அதை மனதுக்கு ஒரு நகைச்சுவைத் துணுக்கு போலச் சொல்லுங்கள். எதிர்பார்ப்பு, ஏமாற்றத்தில் முடிவது நல்லதல்ல. எனவே, அந்த வெற்றிகளை அடுத்த நாளுக்கு ஒத்தி வைத்திருப்பதாய்ச் சொல்லிவிட்டு நிம்மதியாக உறங்குங்கள். உங்களுக்குள் நல்ல எண்ணங்களும் நேர்மறையான நம்பிக்கைகளையும் நிரம்பிக் கிடக்கும்போது இலட்சியப் பயணத்தை மிக எளிதாக மேற்கொள்வீர்கள். முயன்று பாருங்களேன்!

(மரபின்மைந்தன் முத்தையா எழுதிய வாழ்க்கையென்ன வாழ்ந்து பார்க்கலாம் என்னும் புத்தகத்தில் இருந்து)

வாழ்க்கையென்ன வாழ்ந்து பார்க்கலாம்!-15

15. முரண்பாடுகளில் இருந்து உடன்பாடு நோக்கி…
மனித மனங்களில் அதிக பட்சம் பதற்றத்தை ஏற்படுத்தக்கூடியவை எவையென்று தெரியுமா? மற்றவர்களுடனான முரண்பாடுகள்தான். நம்முடைய கருத்துக்கு எதிராக ஒருவர் எதையாவது சொல்லிவிட்டால் முதலில் மெதுவாக மறுக்கிறோம். வாதம் தொடரத் தொடர உடல் பதறுகிறது. ரத்தம் கொதிக்கிறது. மூளை சூடாக வார்த்தை தடிக்கிறது. அந்தப் பதற்றம் பல மணி நேரங்களுக்கு நம்மைப் புரட்டிப்போடுகிறது.

அது மட்டுமா? மீண்டும் அந்த மனிதரைப்பற்றி யோசித்தாலோ, எங்காவது பார்த்தாலோ நம்மை மறுபடியும் அதே பதற்றம் ஆட்டி வைக்கிறது.

நம்முடன் ஒருவர் முரண்படுவதையே நாம் ஏற்கவில்லை என்றால், அதுவே அடிப்படையின் முரண்பாடுகள். இந்த உலகில் ஒரே ஒரு கருத்து என்று ஒருநாளும் இருந்ததில்லை.

எனவே, மற்றவர்கள் நம்முடன் முரண்படுவதை அனுமதிக்கும்போதுதான், நமக்கு மற்றவர்களின் கருத்துகளோடு முரண்பட உரிமை இருக்கிறது.

இந்தத் தெளிவு ஏற்பட்டாலே முரண்பாடுகளைத் தீர்ப்பதில் முதலடி எடுத்து வைக்கிறீர்கள் என்று அர்த்தம்.

எந்த முரண்பாடு நீண்டுகொண்டே போகும் தெரியுமா? எதிர்த்தரப்புக்கு சமரசத்தில் அக்கறையில்லை என்று தெரிந்தால் மட்டும்தான் யாருமே தொடர்ந்து வாதிட்டுக் கொண்டிருப்பார்கள்.

முரண்பாடு என்று வந்ததுமே ஒரு பொதுவான தீர்வுக்கு நீங்கள் தயாராக இருப்பதை எதிர்த்தரப்புக்கு உணர்த்துவது முக்கியம்.

சிக்கலே இல்லாத பல வழக்குகள்கூட, வெறும் வீம்பு காரணமாக நீண்ட காலமாய் நடந்துகொண்டிருக்கின்றன. சமரம், சமாதானம் என்பதெல்லாம் தோற்றுப்போவது என்கிற ஒரு தவறான எண்ணம் இருந்துகொண்டிருக்கிறது.

சமரம் என்பது சிக்கலுக்குப் புதிய தீர்வைக் கொண்டு வருவது. இப்போது இருப்பதைவிடவும் சுமூகமான, சுதந்திரமான சூழ்நிலையை உருவாக்குவது. எனவே, உங்கள் கருத்தை உறுதியாக வலியுறுத்தும்போதே சமசரதிற்கும் வாய்ப்பு இருப்பதை எதிர்த்தரப்புக்கு உணர்த்துங்கள்.

இதையும் மீறிப்போகுமானால், நம்பகமான நடுநிலைநிலையாளர்களை நாடலாம்.

நீங்களே பேசித் தீர்த்தாலும் சரி, நடுநிலையாளர்களை அணுகினாலும் சரி, பொதுத்தீர்வு காண்பதில் நீங்கள் ஆர்வமாயிருந்தாலே எதிர்த்தரப்பில் இருப்பவரும் இறங்கிவருவார்.

முயன்று பாருங்கள். முரண்பாடு மாறும். உடன்பாடு சாத்தியமாகும்.

(மரபின்மைந்தன் முத்தையா எழுதிய வாழ்க்கையென்ன வாழ்ந்து பார்க்கலாம் என்னும் புத்தகத்தில் இருந்து)

வாழ்க்கையென்ன வாழ்ந்து பார்க்கலாம்!-14

எங்கிருந்து வருகின்றன எதிர்மறை எண்ணங்கள்?
ஒரு செயலைத் தொடங்கும்போது, வெளியிலிருந்து வரும் எதிர்ப்புகளைக்கூட கையாள முடியும். உங்களுக்குள்ளேயே எழுகிற எதிர்ப்புகளைக் கட்டுப்படுத்தாவிட்டால் அவை எதிர்மறை எண்ணங்களாக உங்களுக்குள் பதிந்துவிடும்.

எதிர்மறை எண்ணங்கள் அடிமனதில் பதிவாகும்போது, அவை உங்களைப் பற்றிய பலவீனமான ஒரு பிம்பத்தை உங்களுக்குள் ஏற்படுத்துகின்றன.

அவை, அந்தப் பிம்பத்தைத் திரும்பத் திரும்பக் காட்டி, அந்தப் பலவீனத்தை உங்கள் ஆளுமையின் ஓர் அங்கமாகவே மாற்றிவிடுகின்றன.

உங்கள் ஆளுமையில் அந்த பலவீனமான அம்சம் இருந்தால், உங்களை சரியாக செயல்படவிடாது.
அந்தப் பலவீனத்தை அகற்ற வேண்டுமென்றால் முதலில் எதிர்மறை எண்ணங்கள் எங்கிருந்து வருகின்றன என்பதைப் பார்க்க வேண்டும்.

அந்த எண்ணங்களை அகற்ற, சில அடிப்படைக் குணாதியங்களை மாற்ற வேண்டும். இதோ, எதிர்மறை எண்ணங்களின் விஷமூலங்கள்.

பாதுகாப்பு பற்றிய அச்சம்
வாழ்க்கையைப் பாதுகாப்பாக நடத்த வேண்டும் என்கிற அச்சம் அனைவருக்குமே உண்டு. புதிதாக ஒன்றைத் தொடங்கினால் எதையாவது இழக்க வேண்டி வருமோ என்கிற அச்சம்தான், அந்தச் செயலை ஆரம்பிக்கவிடாமல் தடுக்கிறது.

எனவே, புதிய செயலைத் தொடங்குவதில் என்னென்ன ஆபத்துகள் இருக்கின்றன. அவற்றை எப்படியெல்லாம் எதிர்கொள்ளப் போகிறீர்கள். அப்படி எதிர்கொண்டு அந்தச் செயலைச் செய்வதால் என்னென்ன நன்மைகள் என்றெல்லாம் விரிவான குறிப்பை எழுதி வைத்துக்கொள்ள வேண்டும்.
பாதுகாப்பு பற்றிய அச்சம் வரும்போதெல்லாம் அந்தக் குறிப்பை நன்றாகப் பார்த்து நினைவுபடுத்திக் கொண்டால் நம்பிக்கை வளரும். அச்சம் மெல்ல மெல்ல மறையும்.

தோல்வி பற்றிய அச்சம்
பொதுவாகவே, தோல்வி பற்றிய அச்சம் எல்லோருக்கும் உண்டு. எது அச்சம் தருகிறதோ அதை முதலில் எதிர்கொள்வதுதான் அந்த அச்சத்தை வெல்வதற்கான வழி. ஒரு நல்ல செயலைச் செய்வதற்கான எல்லாத் தகுதிகளும் இருக்கும். தவறு நேர்ந்தால் எல்லாம் இகழ்வார்களே என்ற அச்சம் காரணமாக அதைத் தள்ளிப்போடுவார்கள்.

இவர்கள், அந்தச் செயல் வெற்றி பெறும்போது எத்தகைய பெயரும் புகழும் ஏற்படும் என்பதை மனச்சித்திரமாக்கிப் பார்த்தாலே, இந்த அச்சத்தின் விளைவாக எழும் எதிர்மறைச் சிந்தனைகளை எளிதாக வென்றுவிடலாம்.

இவை பெரும்பாலும் பழைய தவறுகளின் எதிரொலிகள். ஒன்றைச் சரியாக செய்து முடிக்க வேண்டும் என்கிற எச்சரிக்கை உணர்வை ஏற்படுத்தும் வரையில், இந்தச் சந்தேகம் நல்லதுதான். ஆனால், செயல்படவிடாமல் தடுக்கும் அளவு முற்றும்போதுதான் அந்தச் சந்தேகம் எதிர்மறை எண்ணமாகிறது.

சந்தேகம் என்பது, சாலைகளில் ஒரு வேகத்தடை போல் இருக்கும் வரைக்கும் சிக்கலில்லை. அந்த வேகத் தடை உங்கள் பாதையையே தடை செய்யக்கூடாது. எனவே, சந்தேகம் ஓர் எல்லைக்கு மேல் வளர்கிறதென்று தெரிந்தால் அதை அங்கேயே அலட்சியப் படுத்துங்கள்.

மாற்றம் பற்றிய அச்சம்
புதிதாக ஒன்றுக்கு மாறுவது, புதிய சூழலை எதிர்கொள்வது என்பதில் எல்லாம் இருக்கிற தயக்கங்களைத் தாண்டிவிட வேண்டும். இந்த அச்சம் இருக்கிறதே, இது சமூக உறவுகளைக் கூட வளரவிடாமல் உங்களை சங்கோஜம் மிக்க மனிதராக மாற்றிவிடும். எனவே, முடிந்த வரையில் புதிய இடங்களை – புதிய மனிதர்களை – புதிய வாழ்க்கைச் சூழல்களைத் தேடிப்போய்ப் பழகுங்கள்.

இந்த நான்கு குணங்களில்தான் எதிர்மறைச் சிந்தனைகள் பெரும்பாலும் ஏற்படுகின்றன. அவற்றை மாற்றினாலே போதும். சாதனைகள் செய்வது சுலபம்.

(மரபின்மைந்தன் முத்தையா எழுதிய வாழ்க்கையென்ன வாழ்ந்து பார்க்கலாம் என்னும் புத்தகத்தில் இருந்து)

வாழ்க்கையென்ன வாழ்ந்து பார்க்கலாம்!-13

கடவுளை வணங்கினால் காசு கிடைக்குமா?
கடவுளைக் கும்பிடுபவர்கள் இரண்டு வகை. பயன் கருதாமல் கடவுளை வணங்க வேண்டும். தேவைகளின் பட்டியலைத் தூக்கிக்கொண்டு கோவிலுக்குப் போகக்கூடாது. இது சிலரின் வாதம்.

கடவுள் நம் பிரார்த்தனைகளுக்குக் காது கொடுப்பார். நாம் கேட்பதெல்லாம் கொடுப்பார். எனவே, தேவைகளைக் கேட்டால் தவறில்லை. இது இன்னும் சிலரின் வாதம்.

இந்த இரண்டில் எது சரி? முதலில், கடவுளிடம் பிரார்த்திப்பது என்றால் என்ன என்பதைப் பார்க்கலாம். கடவுள் என்று கூறினாலும் சரி, இயற்கை என்று கூறினாலும் சரி, எதுவாக இருந்தாலும், அது ஒரு மகத்தான சக்தி.

காற்றில் கலந்து வரும் ஒலியலைகள், வானொலியை சரியான அலைவரிசையில் வைக்கும் போது ஒலிவடிவம் பெறுகிறதல்லவா? அந்த சக்தியும் அப்படித்தான். அந்த சக்தியைப் பெறவேண்டி நம் மனம் ஒருமுகப்படும்போது, அந்த சக்தி நமக்குள் நிறைகிறது. இதைக் கடவுள் என்று நம்பினாலும் நம்பாவிட்டாலும் அதன் துணை கிடைக்கும்.

ஏனென்றால், இந்த சக்தியைப் பெறுவதற்கான தகுதி ஒவ்வொரு மனிதனுக்குள்ளேயும் இருக்கிறது. அந்த உள்முக ஆற்றலை வளர்த்துக்கொள்ளாமல் வீண் பொழுதுபோக்குகளில் நேரம் கழிக்கும்போது நம் ஆற்றல் வீணாகிறது; பலமிழக்கிறது.

பொதுவாகவே, நமக்கு ஏதாவது வேண்டும் என்று எப்போது தோன்றுகிறது? நண்பர்கள் வீட்டுக்குப் போகிறோம். புதிய கார் வாங்கியிருக்கிறார்கள். நமக்கும் வாங்குகிற ஆசை வருகிறது. அப்போது என்ன செய்கிறோம் தெரியுமா? அவர்கள் வருமானத்தையும் நம் வருமானத்தையும் ஒப்பிடுகிறோம். “அவனுக்கு மாமனார் உதவியிருப்பார். நம்மால் முடியாது” என்று நாமே முடிவுக்கு வருகிறோம்.

அப்படியானால், கார் வாங்கும் ஆசையின் குரல் கேட்டு நமக்கிருக்கும் ஆற்றல் மேலெழும்போது, நாமே அதனைக்குட்டி, தலையில் தட்டி உட்கார வைத்துவிடுகிறோம்.

இந்தத் தடையைப் போடாமல், “கார் வாங்க வேண்டும்” என்ற உள்முக ஆசையை, நம்மைவிடப் பெரிய சக்தி ஆக்கிரமிக்கும் விதமாகத் திறந்துவிடவேண்டும். இதைத்தான் பிரார்த்தனை என்கிறார்கள்.

அப்படியா? கடவுளிடம் போய் கார் வேண்டும். காசு வேண்டும் என்று கேட்டால் கிடைக்குமா? உங்களுக்குள் இந்தக் கேள்வி எழுகிறதுதானே!

உண்மையில் இறையாற்றல் அல்லது பிரபஞ்ச சக்தியிடம், நீங்கள் எதையாவது கேட்டுப் பிரார்த்தனை செய்தால் நீங்கள் கேட்டதைத் தருவதில்லை. ஆனால் தன்னையே தருகிறது.

உங்களுக்குத் தரப்படுகிற சக்திக்கு நீங்கள் செயல்வடிவம் தருகிறபோது, அது காசாகவோ, காராகவோ எதுவாகவோ மாறுகிறது.

எனவே, உங்களுக்குள் அந்தத் தேடல் முற்றுகிறபோதுதான் உங்களையும் மீறிய சக்தியை நீங்கள் வேண்டுகிறீர்கள். அந்தத் தேடல் ஆழமானதாக இல்லாதபோது, உங்கள் எல்லைகளுக்குள்ளேயே யோசித்து, அது சாத்தியமில்லை என்று நீங்களே கைவிட்டு விடுகிறீர்கள்.

ஒன்று உங்களுக்கு வேண்டுமென்று ஆழமாக ஆசைப்படும்போது, உங்கள் ஆழ்மனதில் முதல் வாய்ப்பின் வாசல் திறக்கிறது. அந்த எண்ணம் தீவிரப்படும்போது, அதனை அடைவதற்குரிய சக்தி உங்களுக்குள் நிரம்புகிறது. அதற்கு செயல்வடிவம் கொடுக்கும்போது அந்த விருப்பம் நிறைவேறுகிறது. சில வசதிகளை வேண்டும்போது, அந்த ஆசை மேல்மனதில் நின்றுவிட்டுக் கலைகிறதா? ஆழ்மனதில் சென்று சேர்கிறதா என்று பாருங்கள். ஆழ்மனதில் சென்று சேர்கிற ஆசைகள் நிச்சயம் நிறைவேறும்.

எனவே, தேவைகளை ஒரு தவம்போல மேற்கொள்ள வேண்டும். அவை வரமாக வந்து வாய்க்கும். உலகில் இல்லாதவர்கள் பலர் இருக்கிறார்கள். வசதியானவர்கள் சிலர்தானே இருக்கிறார்கள். இது ஏன்? இந்தக் கேள்விகளை வள்ளுவரிடம் கேட்டபோது, “சிலர்தான் தவம் செய்கிறார்கள். அதுதான் காரணம்” என்றார்.

“இலர்பல ராகிய காரணம், நோற்பார்
சிலர்பலர் நோலா தவர்” என்பது திருக்குறள்.
தவம் என்றால், காட்டில் போய் அமர்ந்து தவம் செய்வது மட்டுமல்ல. ஓர் இலட்சியத்தை மனதில் சங்கல்பம் செய்துகொண்டு அதை உறுதியோடு வேண்டுவதும்தான்.

எனவே, உங்களுக்கு என்ன வேண்டும் என்று உங்களைக் கேளுங்கள். உறுதியோடு கேளுங்கள். நிச்சயம் கிடைக்கும்; பாருங்கள்!

(மரபின்மைந்தன் முத்தையா எழுதிய வாழ்க்கையென்ன வாழ்ந்து பார்க்கலாம் என்னும் புத்தகத்தில் இருந்து)

வாழ்க்கையென்ன வாழ்ந்து பார்க்கலாம்!-12

மாற்றம் ஒன்றே முன்னேற்றம்!
அந்த முதல் குரங்கு மட்டும் மனிதனாய் மாற மறுத்திருந்தால், இத்தனை முன்னேற்றங்கள் ஏற்பட்டிருக்குமா என்ன?

பழைய அணுகுமுறைகளையும், நம்பிக்கைகளையும் குரங்குப்பிடியாய்ப் பிடித்துக் கொண்டிருப்பவர்களைப் பார்த்து இந்தக் கேள்வியைக் கேளுங்கள். அப்புறம் அவர்களுக்குச் சொல்லுங்கள்…

மாற்றம் ஒன்றே முன்னேற்றம்!
புறாக்களில் கட்டி அனுப்பிய கடிதம் ஃபேக்ஸில் பறப்பது முதல், கல்லில் எழுதிய மனிதன் கணிப்பொறியில் எழுதுவது வரை, எல்லா முன்னேற்றங்களுமே முதல் மாற்றத்தை அனுமதித்ததால்தான் ஆரம்பமானது.

இன்று வந்திருக்கும் நவீன கருவிகள் எல்லாம் அதிசய மாற்றத்தைக் கொண்டு வந்திருப்பதாய்ச் சொல்கிறோமே, அப்படி அவற்றில் என்னதான் இருக்கிறது? சுருங்கச் சொல்லிவிடலாம்.

1. எளிமை 2. வேகம் 3. வசதி
உங்கள் வாழ்விலும் சரி, தொழிலிலும் சரி, இந்த மூன்று அம்சங்களைக் கொண்டு வரக் கூடிய எந்த மாற்றத்தையும் ஏற்றுக்கொள்ளுங்கள். ஏனென்றால் அவற்றின் மூலமாக முன்னேற்றம் நிச்சயம்.

மாற்றங்களை யார் எதிர்ப்பார்கள்?
வாழ்வின் யதார்த்தங்களை எதிர்கொள்ள மறுப்பவர்களும், வெற்றிக்கான விலையைக் கொடுக்கத் தயங்குபவர்களும், தங்கள்மேல் நம்பிக்கை இல்லாதவர்களும் மாற்றங்களை எதிர்ப்பார்கள்.
பஞ்சாயத்துத் தலைவர் பதவியிலேயே இருந்து பழகியவர், பாராளுமன்றத் தேர்தலில் போட்டியிடத் தயங்குவார். பஞ்சாயத்தைவிடவும் பாராளுமன்றம் பெரிது என்பது அவருக்குப் புரியாது. ஒன்றைப் புதிதாய் முயன்று பார்க்கப் பெரும்பாலானவர்களால் முடியாது.

கூட்டுப்புழுவாய் இருப்பதே குதூகலம் என்று நின்றுவிட்டால், வண்ணத்துப்பூச்சியாய் சிறகு விரிப்பது சாத்தியமில்லை. பரிணாமத்தின் அவஸ்தைகளுக்குப் பயந்தால் வானம் அளந்து பறந்துவர வாய்ப்பில்லை.

யாரெல்லாம் மாற்றங்களை ஏற்பார்கள்?
திறந்த மனம், காலத்தின் போக்கை ஏற்கிற பக்குவம், வளர வேண்டுமென்ற ஆர்வம் இவையெல்லாம் மாற்றங்களை ஏற்பவர்களின் மனப்பான்மைகள். பல முதிர்ந்த அரசியல் தலைவர்கள் கடந்த சில ஆண்டுகளாகக் கம்ப்யூட்டர் பயிலத் தொடங்கியிருக்கிறார்கள். இது ஓர் உதாரணம்.

வணிகத்தில் போட்டி அதிகரிக்கும்போது எத்தனையோ மாற்றங்களை ஏற்க வேண்டியிருக்கும். கிரெடிட் கார்டுகளை ஏற்பது என்கிற சிறிய மாற்றத்திற்குக்கூடத் தயாரில்லாமல் சில நிறுவனங்கள் சிரமப்படுகின்றன.

வாடிக்கையாளர்களுக்கேற்ப மாறுதல்கள்!
வாடிக்கையாளர்களுக்கு என்னென்ன தேவையோ அதற்கேற்ப நிறுவனம் மாற வேண்டும். துவரம்பருப்பு இருக்கிறதா என்று கேட்டால், கடலைப்பருப்பு இருக்கிறது என்று சொல்வதெல்லாம் மறைந்துபோன மளிகைக் கலாச்சாரம்.

எல்லாமே இப்போது வாடிக்கையாளர்கள் வாசலில் இறங்குகிற காலத்தில் இருக்கிறோம். உங்கள் வாடிக்கையாளரைக் கொத்திக்கொண்டு போக சில வணிகர்கள் காத்திருக்கிறார்கள். எனவே நிர்வாகத்திலும், வணிக அணுகுமுறையிலும் தேவையான மாற்றங்களை ஏற்படுத்துங்கள்.

புகார்கள் வருகின்றனவா? சந்தோஷப்படுங்கள்!
பல ஆரோக்கியமான மாற்றங்களின் ஆரம்பப்புள்ளியே வாடிக்கையாளர்களின் புகார்கள்தான். உங்கள் மேல் அக்கறையுள்ள வாடிக்கையாளர்கள் மட்டும்தான் உங்களிடம் புகார்களைக் கொண்டுவருவார்கள். மற்றவர்கள், உங்களிடம் குறை கண்டால் உங்களிடம் வருவதை நிறுத்திவிடுவார்கள். எனவே புகார்களைக் காதுகொடுத்துக் கேளுங்கள். புகாரின் அடிப்படையில் நீங்கள் செய்திருக்கும் மாற்றங்களைக் கடிதம் வழியாகவோ தொலைபேசி மூலமாகவோ தெரிவியுங்கள்.

அலுவலர்களுக்கு அதிகாரம் கொடுங்கள்
வாடிக்கையாளர் மனநிறைவே முக்கியம் என்பதை உங்கள் ஊழியர்களுக்குத் தெளிவுபடுத்துங்கள். புகார்களை மென்மையாகக் கையாண்டு, வாடிக்கையாளர் மன நிறைவுக்கேற்ற மாற்றங்களைச் செய்ய அலுவலர்களுக்கு அதிகாரம் கொடுங்கள்.

மாற்றங்களின் ஆரம்பமே முன்னேற்றத்தின் ஆரம்பம்
இதுதான் ஆதிகாலம் தொட்டே மனிதகுலத்தின் வாழ்க்கை முறையாக இருந்திருக்கிறது. மாற்றங்களை ஓர் அந்நியமான வாழ்க்கை முறையின் அறிமுகம் என்று கருதுபவர்கள் ஜெயித்ததில்லை. தங்கள் வாழ்க்கை முறையின் அடுத்தகட்ட படிநிலை என்று அடையாளம் கண்டுகொண்டவர்களே வெல்கிறார்கள்.
எனவே உங்கள் இப்போதைய நிலையை மூன்றாகப் பிரித்துக் கொள்ளுங்கள்.

தனிமனித நிலை,
தொழில்,
சமூகத் தொடர்புகள்
மூன்றிலும் எந்த நிலையில் இருக்கிறீர்கள் – என்னென்ன மாற்றங்கள் தேவை என்பதைப் பட்டியலிடுங்கள். மாறத் தொடங்குங்கள். அதாவது முன்னேறத் தொடங்குங்கள்!

(மரபின்மைந்தன் முத்தையா எழுதிய வாழ்க்கையென்ன வாழ்ந்து பார்க்கலாம் என்னும் புத்தகத்தில் இருந்து)

வாழ்க்கையென்ன வாழ்ந்து பார்க்கலாம்!-11

முதல் வெற்றிக்குப் பிறகு…

முதல் வெற்றி கொடுக்கும் மனத்துணிவு, அபாரமானது. பாராட்டு மழை, பணம், புகழ் என்று முப்படைகளும் அணிவகுத்து மரியாதை செய்யும்போது, குதூகலத்திற்குக் கேட்கவா வேண்டும்? நிற்க முடியாத அளவு வெற்றியின் கனம் அழுத்தும் நேரத்தில், இதைத் தக்கவைத்துக் கொள்ள வேண்டுமே என்ற எச்சரிக்கை உணர்வு ஏற்பட்டவர்களுக்கு முதல் வெற்றியே முன்னேற்றப் பாதை. அந்த உணர்வை இழந்தவர்களுக்கு முதல் வெற்றியே மூழ்க வைக்கும் போதை!

ஓங்கி ஒலிக்கும் பாராட்டுக் குரல்களுக்கு நடுவே, “இப்போதுதான் எச்சரிக்கையாய் இருக்க வேண்டும்” என்ற குரல் முணுமுணுப்பாகத்தான் கேட்கும்.

அதற்குக் காது கொடுத்தவர்கள், தங்களைத் தாங்களே காப்பாற்றிக் கொள்வார்கள். அந்த முணுமுணுப்பைக் கூர்ந்து கவனித்தால் அது என்ன சொல்கிறது தெரியுமா?

அடுத்தடுத்த வெற்றிக்கு ஐந்து கட்டளைகள்
ஆமாம்! ஐந்து விஷயங்களைச் சொல்கிறது. முதலாவது புதுமைக்கான தேடல். புதுமையாக எதையாவது செய்ய வேண்டும் என்று சொல்லிக்கொண்டே இருப்பவர்கள் எதையுமே செய்வதில்லை.

புதுமைக்கான தேடல் உங்களுக்குள் ஏற்பட்டு ஒரு தீப்பொறிக் கனலைத் தொடங்குமேயானால், அந்தப் பொறியை உங்கள் உள்மனமே ஊதி, ஊதி பெரிய நெருப்பாகச் சுடர்விடச் செய்யும். “என் வாழ்வில் பெரிய மாற்றம் வேண்டும்” என்ற இந்தத் தேடல் மிகவும் வலிமையான சக்தியையும் உத்திகளையும் கொடுக்கும்.

துல்லியமான கனவு

உங்கள் தொழிலில் எந்த உயரத்தை எட்ட விரும்புகிறீர்கள்? இந்தக் கனவைத் துல்லியமாக வரையறை செய்துகொள்ள வேண்டும்.
உதாரணமாக, பெரிய ஆலை ஏற்படுத்துவது என்பது பொதுவான கனவு. இத்தனை டன்கள் உற்பத்தி என்று வரையறையை மனதில் ஏற்படுத்திக்கொண்டு, அதை நோக்கி உழைப்பதே துல்லியமான கனவு.

ஆயத்தம்
நீங்கள் செய்யும் புதுமைகள் ஆதாயம் தருவதாக அமையும்வரைக்கும், அதற்கான முக்கியத்துவம் கிடைக்கப்போவதில்லை. எனவே மனதில் உதித்த புதுமையான சிந்தனையைச் சரியான முறையில் செயல்படுத்த ஆயத்தமாக வேண்டும். அதற்கான படிநிலைகள் அங்குலம் அங்குலமாகத் திட்டமிடப்படவேண்டும்.

நம்பிக்கை
ஒன்று தெரியுமா? உங்கள் கனவுகளுக்கு உருவம் தந்து அதனை வெற்றிகரமாக்கும் விருப்பம் அடிமனதுக்குள் ஆழப்பதிந்திருக்கிறது. அந்த ஆழமான விருப்பமே நம்பிக்கை. அந்த நம்பிக்கையை நீங்கள் உறுதியாக்கிக்கொண்டே வரும்போது அந்த நம்பிக்கையே வளர்ச்சியையும் வெற்றியையும் சந்தோஷத்தையும் கொடுக்கும்.

செயல்படுத்துதல்
எத்தனை புதுமையான சிந்தனைகள் பிறந்தாலும், எவ்வளவு கற்பனைகள் இருந்தாலும், அவற்றைச் செயல்படுத்தத் தொடங்கும்போது கூடுதல் சக்தி பிறக்கிறது. அதன் விளைவாக வெற்றி கிடைக்கிறது. கனவுகளின் சுகத்திலேயே கரைந்துவிடாமல், சரியான நேரம் பார்த்துச் செயல்வடிவம் தருபவர்கள்தான் தங்கள் வெற்றிகளைத் தக்க வைத்துக்கொள்கிறார்கள்.

முதல் வெற்றியின் விளைவாக, அடுத்தடுத்த வெற்றிகள் அணிவகுக்க வேண்டுமென்றால், இந்த ஐந்து அம்சங்களை உங்களுக்குள் அணிவகுக்கச் செய்யுங்கள். வெற்றிகள் நிச்சயம்!

(மரபின்மைந்தன் முத்தையா எழுதிய வாழ்க்கையென்ன வாழ்ந்து பார்க்கலாம் என்னும் புத்தகத்தில் இருந்து)