27. இன்னொரு தடவை சொல்லுங்க!

நீங்கள் எதையாவது சொல்லி, யாராவது இப்படிக் கேட்டார்கள் என்றால், நீங்கள் உங்களைக் கொஞ்சம் கவனிக்க வேண்டும் என்று அர்த்தம். வேறொன்றுமில்லை. “என்ன சொன்னீங்க” என்று யாரும் கேட்டால், நீங்கள் சொன்ன விஷயம் தெளிவாகப் புரியவில்லை என்பது தெளிவாகிறது.

சொல்ல விரும்பியதை சரியாகவும் சரளமாகவும் சொல்லத் தெரிந்தால்தான் வெற்றிக்கான வாசல் திறக்கும்.

பதற்றத்தின் காரணமாக வேகமாகவும் தெளிவின்றியும் நீங்கள் வார்த்தைகளை உச்சரிப்பதால் இந்த சிரமம் ஏற்படலாம். அல்லது, மனதில் இருப்பதை மற்றவர்கள் புரிந்து கொள்ளும் விதமாய் சொல்ல முடியாவிட்டாலும் இந்த நிலை ஏற்படலாம்.

இவை இரண்டும் தனித்தனி காரணங்களா? இல்லை. ஒன்றைத் தெளிவாக சொல்ல முடியாது என்கிற அச்சம் உள் மனதில் உள்ளதாலேயேகூட நீங்கள் பதற்றமடையக்கூடும்.

அப்படியானால், பதற்றத்தின் காரணம் பயிற்சியின்மை. எந்தக் குறையையும் பயிற்சியாலும், முயற்சியாலும் மாற்றமுடியும் என்பது பாலபாடம். பயிற்சியை உற்சாகமாக, உடனே தொடங்குங்கள்.

உதாரணமாக, சரளமாக ஆங்கிலம் பேசுவதில் தடை ஏற்படுகிறதா? எளிய ஆங்கிலத்தில் உள்ள புத்தகம் எதையாவது படியுங்கள். இரண்டு பக்கங்கள் படித்துவிட்டு, நீங்கள் படித்ததன் சாரத்தை உங்கள் நடையில் உங்கள் வார்த்தைகளில் சொல்லிப் பாருங்கள். இந்தப் புத்தகத்தைப் படிக்க முடியாத ஒருவருக்கு, நீங்கள் படித்துச் சொல்வதான பாவனையில் நிதானமாக சொல்லுங்கள். பிறகு, உங்கள் நடையில் எழுதிப் பாருங்கள். நாளுக்கு ஒரு மணிநேரமாவது இந்தப் பயிற்சி மேற்கொள்வீர்களென்றால் மிக விரைவிலேயே வித்தியாசத்தை உணர்வீர்கள்.

மொழி ஆளுமை கைவரத் தொடங்கியதுமே பலர் நீளமாகவும் அடர்த்தியாகவும் பேச வேண்டும் என்று நினைக்கிறார்கள். எந்த மொழி பேசினாலும் இந்த எண்ணம் ஏற்படுவதைத் தவிர்க்க முடியாது. ஆனால் தவறில்லாமல் நம்பிக்கையோடு பேச வேண்டுமென்றால் சின்னச் சின்ன வாசகங்களாகப் பேசவேண்டும். “நான் அமெரிக்கா செல்வதற்காக சென்னை போனபோது ரமேஷை சந்தித்தபோது உங்களைப் பற்றி விசாரித்தவுடன் உங்கள் எண் கிடைத்தது.” இதில் யார் விசாரித்தார்கள், யாருக்கு எண் கிடைத்தது என்பதை ஆராய்ச்சி செய்துதானே அறிந்து கொள்ள வேண்டும்.

இதற்குப் பதிலாக, “அமெரிக்கப் பயணத்திற்காக சென்னை போய்க் கொண்டிருந்தேன். வழியில் ரமேஷைப் பார்த்தேன். உங்கள் தொலைபேசி எண்ணைக் கேட்டேன். கொடுத்தார். உங்களைப் பற்றிப் பேசிக் கொண்டிருந்தேன்.” இப்படிச் சொல்கிறபோது விஷயம் தெளிவாகிறது. சொல்ல விரும்புவதை மனதுக்குள்ளே ஒழுங்குபடுத்திக் கொள்ளும்போது துல்லியமாகவும் தெளிவாகவும் தகவல் பரிமாற்றம் நிகழ்கிறது.

எதிரே இருப்பவர் சொல்வது நமக்கு சரியாகப் புரியாதபோதும்கூட அவர் கேட்பது ஒன்றாகவும் நாம் சொல்வது ஒன்றாகவும் ஆகிவிட வாய்ப்பிருக்கிறது. சொல்வதை முதலில் நிதானமாகக் கேளுங்கள். கேட்ட அடுத்த விநாடியே பதிலைக் கொட்ட வேண்டிய அவசியமில்லை. விஷயத்தை நன்றாக உள்வாங்கி, சரியான கோணத்தில் சிந்தித்து, தெளிவான பதிலை சொல்லுங்கள்.

ஒரு விஷயத்தை விளக்க வேண்டும் என்றதுமே, அதற்காக ஏராளமான தகவல்களைத் திரட்டிக் கொள்ள விரும்புவது இயற்கை. ஒன்று விரிவாக விளக்குவது என்பதைவிட, சுவாரசியமாக எடுத்துச் சொல்வது என்பதே முக்கியம். இதற்கு ஆரம்ப காலத்தில் உங்களுக்கு மிகவும் பிடித்தமான விஷயத்தை நண்பர்கள் மத்தியில் விளக்குங்கள். உங்கள் குழந்தைகளுக்குக் கதை சொல்லும் கலையை ஆர்வத்துடன் செய்யுங்கள்.

எல்லாவற்றையும்விட, கலகலப்பான மனிதனாக, பல விஷயங்களையும் தெரிந்து வைத்திருக்கிற மனிதராக இருங்கள். இயல்பாக உங்கள் கவனத்திற்கு வருகிற விஷயங்களை சிரத்தையுடன் மனதில் பதியவைத்துக் கொள்ளுங்கள். அவற்றைப் பொருத்தமான நேரங்களில் சொல்லுங்கள்.
சரி….. ஆரம்பிக்கலாமா? இந்தக் கட்டுரையில் படித்த விஷயங்களை, பக்கத்தில் இருக்கிற உங்கள் நண்பரிடமோ உறவினரிடமோ உங்கள் நடையில் சொல்லுங்கள் பார்க்கலாம்!!

– மரபின் மைந்தன் ம.முத்தையா

நினைத்தது போலவே வெற்றி என்னும் நூலிலிருந்து..

26. வேலை இழக்க நேர்கிறதா?

உலகெங்கும், பொருளாதாரப் பின்னடைவின் விளைவாக பலருக்கும் வேலை வாய்ப்பு பறி போகிறது. குறிப்பாக, தனியார் நிறுவனங்களில் இந்தநிலை பெருமளவில் இருக்கிறது. ஆட்குறைப்பு, நிறுவனத்தின் உற்பத்தியோ, தொழிலோ குறைவதால் ஏற்படுகிறது. இதற்குப் பெரிய அளவில் தீர்வுகள் எதுவும் தென்படவில்லை.

அலுவலர் அல்லது ஊழியரின் செயல்திறன் நன்றாகவே இருந்தாலும், தொழில்சூழல் சரியாக இல்லாத போது வேலையை விட்டு விலக்குவது தவிர்க்க முடியாத ஒன்றாகவே ஆகிவிட்ட சூழலில், வேலையை இழக்க நேரும் தனிமனிதர்கள் இந்தச் சூழலை எப்படியெல்லாம் எதிர்கொள்ளலாம்? யாருக்காவது வேலை போனால், உடனடியாக என்ன செய்யலாம்? இந்தக் கேள்விக்கு, உலக அளவில் மனிதவள மேம்பாட்டு நிறுவனர்கள் விடையளித்து வருகிறார்கள். வேலைவாய்ப்பு ஆலோசகர் மார்தா ஃபின்னே இது குறித்து ஒரு புத்தகமே எழுதியிருக்கிறார். அவரது வழிகாட்டுதல்கள் சிலவற்றை உள்வாங்கிக்கொண்டு, இந்தியச் சூழலில் சில ஆலோசனைகள் இங்கே தரப்படுகின்றன.

ஒருவேளை – உங்களுக்குத் தெரிந்தவர்கள் யாருக்காவது இப்படியரு சூழல் ஏற்பட்டிருந்தால் அவர்களுக்கு இந்தக் கட்டுரை பயன்படக்கூடும். இந்தக் கட்டுரைக்கான அவசியம் உங்களுக்கோ உங்கள் நண்பர்களுக்கோ ஏற்படக் கூடாது என்கிற பிரார்த்தனையுடன் இந்தக் கட்டுரையை வெளியிடுகிறோம்.

1. வேலை நீக்கம் குறித்த அறிக்கை, முன்னறிவிப்பின்றி தரப்படுகிற சூழலில் உடனடியாக அதில் கையெழுத்திடாதீர்கள். உங்கள் வேலை இழப்பிற்கு ஓரளவேனும் நியாயமான இழப்பீடு வழங்கப்படுகிறதா என்பதை உறுதி செய்து கொண்டு, இருக்கிற சூழலில் இதைவிட நல்ல தொகை கிடைக்க வாய்ப்பில்லை என்று தெரிந்தால் மட்டுமே கையெழுத்திடுங்கள்.

2. பதட்டம் காரணமாக, நிர்வாகத்திடமோ, மேலதிகாரியிடமோ கடுமையாக மோதாதீர்கள். வேறுவழியின்றி நிறுவனம் இந்த முடிவை மேற்கொள்கிறது. நாளை சூழ்நிலை மாறலாம். உங்களுக்கு அவர்களும், அவர்களுக்கு நீங்களும் தேவைப் படலாம்.

3. விஷயத்தைக் கேட்டதும் கண்ணீர் வருகிறதா? மான அவமானம் பார்க்காமல் அழுதுவிடுங்கள். உங்கள் மன அழுத்தம் கண்ணீர் வழியே கரைந்தோடும். உங்கள் உடல் நலனுக்கும், அடுத்த கட்ட முடிவுகளை நோக்கித் தெளிவாக நகரவும் இது உங்களுக்குத் துணை செய்யும்.

4.வருமானத்திற்கு நல்ல வழியை நோக்கி சில ஏற்பாடுகளை செய்துகொள்ள மூன்று மாதங்களாவது ஆகும். எனவே சிக்கனமாக இருக்கப் பழகுங்கள். வேலை இருந்தாலும் இழந்தாலும் சிக்கனம் நல்லதுதான்.

5. வங்கி முதலீடுகளை ஒழுங்குபடுத்தி, வட்டித் தொகை சமச்சீராக வருகிறதா என்று பாருங்கள். வேறு வழியே இல்லாமல் போனாலே ஒழிய சொத்துகளைக் குறைந்த விலைக்கு அவசரப்பட்டு விற்காதீர்கள்.

6. உங்கள் தொழில் திறமை – அனுபவம் போன்றவற்றை, ஒரே நிறுவனத்திற்கு என்றில்லாமல் பல நிறுவனங்களுக்கும் பயன்படும் விதமாக ஆலோசகர் பொறுப்பேற்க முயலுங்கள். உங்களுக்குப் பல ஆயிரங்கள் சம்பளம் கொடுத்த நிறுவனத்திற்குக்கூட சில ஆயிரங்கள் பெற்றுக் கொண்டு பகுதிநேரப் பணிபுரியும் சூழல் அடுத்த சில மாதங்களில் உருவாகலாம்.

7. உண்மை நிலையை குடும்பத்தினருடன் பகிர்ந்து கொள்ளுங்கள். மாற்று வழிகளை அவர்களுடன் கலந்து ஆலோசியுங்கள். குழந்தைகளுக்கு என்ன வயதோ அதற்கேற்ப விஷயத்தைப் பக்குவமாகச் சொல்லுங்கள். பதறாதீர்கள்; பதற்றமடையச் செய்யாதீர்கள்.

8. கோவையில் மேட்டுப்பாளையம் – சிறுமுகை பக்கங்களில் பல தொழில் முனைவோர்கள் குறுகிய காலங்களில் தோன்றி, கடின உழைப்பால் முன்னேறி இன்று நல்ல நிலையில் இருக்கிறார்கள். அந்தப் பகுதிகளில் இருந்த பல நிறுவனங்கள் திடீரென்று மூடப்பட்டதால், பெரும் பின்னடைவைச் சந்தித்து, சொந்த முயற்சியில் தாங்களே நிறுவனங்கள் தொடங்கி வளர்ந்தார்கள் அவர்கள். எனவே, இருட்டிலிருந்து மீண்டு வெற்றியின் வெளிச்சத்தைத் தொடும் வாய்ப்பை வாழ்க்கையே வழங்கும் என்பதை நம்புங்கள்.

9. பதற்றத்திலும் பயத்திலும் பெருமளவு சக்தி வீணாகிறது. அதை ஆக்கபூர்வமான சக்தியாக மடைமாற்றம் செய்யுங்கள். “அடுத்தது என்ன” என்கிற கேள்வியையும் தேடலையும் உங்களுக்குள்ளேயே தீவிரமாக்குங்கள்.

10. நிறுவனத்திலிருந்து வெளியேறும்போது கோப்புகள் – விவரங்களை எடுத்து வர முயலாதீர்கள். ஆனால் நிறுவனம் வழியே நீங்கள் ஏற்படுத்திக் கொண்ட தனிப்பட்ட தொடர்புகளை கைவிட்டுவிடாதீர்கள். உங்கள் புதிய தொழிலுக்கு அந்தத் தொடர்புகள் பெருமளவில் துணை செய்யும்.

11. உலகையே உலுக்கும் பொருளாதாரப் பின்னடைவிற்கு நீங்கள் எவ்விதத்திலும் காரணமில்லை. வேலை இழக்க நேர்ந்தது உங்கள் குறைபாட்டால் இல்லை என்பதை உணருங்கள். அதேநேரம், அடுத்தொரு நிறுவனத்தில் வேலைக்குச் சேரும் வாய்ப்புக் கிடைத்தால் உங்களை அங்கே தவிர்க்க முடியாதவராக நிலை நிறுத்தும் அளவு உங்கள் செயல்திறனைக் கூர்மைப்படுத்துங்கள்.

12. எத்தனை மோசமான பின்னடைவுகளிலும் முனைப்புள்ளவர்கள் முன்னேறிக் கொண்டுதான் இருக்கிறார்கள். இந்தப் பின்னடைவு, உங்கள் செயல்திறனை உங்களுக்கே நினைவூட்டக் கிடைத்த நல்வாய்ப்பு என்பதை மனதில் கொண்டு முன்னைவிடவும் முனைப்போடும் நம்பிக்கையோடும், இந்தப் புதிருக்கான விடையைக் கண்டடையுங்கள்.

– மரபின் மைந்தன் ம.முத்தையா

நினைத்தது போலவே வெற்றி என்னும் நூலிலிருந்து..

25. தள்ளிப் போடாமல் இருப்பது எப்படி?

இந்தக் கேள்வியை யாரிடமாவது கேட்டு பதில் பெறலாம் என்று பரபரப்பாக இருக்கிறதா? பொறுங்கள் – கொஞ்சம் தள்ளிப் போடுங்கள்!! என்ன – முதலுக்கே மோசமாக இருக்கிறதா? யாரையாவது கேட்பதற்கு முன்னால் உங்களையே சில கேள்விகள் கேட்டுக் கொள்ளுங்கள்.

1. வேறு முக்கியமான வேலை வந்தததால் எடுத்த வேலையைத் தள்ளிப் போடுகிறீர்களா? இல்லை சோம்பல் காரணமாகத் தள்ளிப் போடுகிறீர்களா?

2. நேரத்தை வீணடிப்பதென்பது நம்மையும் அறியாமல் நிகழக்கூடிய விஷயம்தான். ஒரு நாளில் எந்த நேரத்தை எப்படி வீணடித்தீர்கள் என்பதை தினமும் டயரியில் குறித்து வையுங்கள்.

3. தள்ளிப் போடுவதை ஒரு வழக்கமாகத் தொடங்கி, வாழ்க்கை முறையாகவே ஆக்கிக் கொண்டவர்கள் எத்தனை பேர்களை உங்களுக்குத் தெரியும்? அவர்கள் என்ன ஆனார்கள்?
இதையெல்லாம் செய்தாலே தள்ளிப் போடுவதில் இருக்கும் எதிர்மறையான விளைவுகள் பற்றி நமக்குப் புரிந்துவிடும்.

ஒரு மளிகைக் கடைக்குப் போகும்போதே நம்மிடம் வாங்க வேண்டிய பொருட்களின் பட்டியல் இருக்கிறதே. ஒவ்வொரு விடியலின் போதும் அந்த நாளில் செய்து முடிக்க வேண்டிய விஷயங்களின் பட்டியல் வேண்டாமா என்ன? தள்ளிப் போடும் பழக்கம் நம்மை விட்டுத் தள்ளிப் போக அடிப்படையில் இன்னொரு வேலையையும் செய்தாக வேண்டும். அதுதான் விடியல் பொழுதைப் பயன்படுத்துவது. விடிந்து சிறிது நேரம் சென்றபிறகு விழிப்பவர்களுக்கு நாள் நகர்கிற வேகத்திற்கு ஈடுகொடுத்து, அதைத் துரத்திப் பிடிப்பதே பெரிய பாடாகி விடுகிறது.

விடியல் நம்மை நன்றாக வேலை வாங்கக் கூடிய நேரம். தள்ளிப் போடுவதைத் தவிர்க்க வேண்டுமென்றால், அந்த வேலைக்குத் தேவையான அடிப்படைப் பொருட்களை சேகரித்துக் கொண்டு, அதன் பின்னர் வேலையைத் தொடங்குவதே உத்தமம்.

இந்தக் கட்டுரையை எழுதுவதற்குக்கூட பேனா, பேப்பர், கிளிப், எழுதுவதற்கான அட்டை என்று ஒவ்வொன்றையும் தவணை முறையில் எடுத்துக் கொண்டு வந்தால், இதை எழுதி முடிக்கிற வேலை கண்டிப்பாகத் தள்ளித்தான் போகும்.

இதையெல்லாம்விட முக்கியம், ஏன் தள்ளிப் போடுகிறோம் என்று நம்மை நாமே கேட்டுக் கொள்வது. ஒரு நாள் முழுவதும் இயந்திரம்போல் யாரும் வேலை பார்த்துக்கொண்டே இருப்பதும் சாத்தியமில்லை. உல்லாசத்திற்குக் கொஞ்ச நேரம், நண்பர்களுடன் பேச சிறிது நேரம் என்று எத்தனையோ விஷயங்களுக்கு சில நிமிஷங்களை அவ்வப்போது ஒதுக்க வேண்டி வருகிறது.

ஏகத்துக்கு வேலை இருப்பதாக நினைப்பவர்கள் இந்த சின்னச் சின்ன சந்தோஷங்களை முற்றாக நீக்கிவிட்டு, வேலையிலேயே முழு கவனம் செலுத்துவதாய்த் தொடங்குவார்கள். இடையில் அலுப்புத் தட்டத் தொடங்கிவிட்டால் போச்சு. இந்த வேலை – சொந்த வேலை – எந்த வேலையையும் செய்யாமல், வேலைக்கான ஆயத்தப் பணியை வேண்டுமென்றே நீட்டிக்க மனது தூண்டத் தொடங்கும். உற்சாகமும் தூங்கத் தொடங்கும்.

நம்முடைய நேரங்களை சமவிகிதத்தில் சரியாகப் பங்கிட்டு வேலைகளில் ஈடுபடப் பழகி விட்டால் நேரம் வீணாவதை நிச்சயமாகத் தடுக்கலாம்.

என்னசெய்ய விரும்புகிறோம் – என்ன செய்து கொண்டிருக்கிறோம். இந்த இரண்டுக்கும் நடுவிலான இடைவெளியை அதிகமாக்குவதே தள்ளிப் போடுகிற மனோபாவம்தான்.

இன்னொன்றும் முக்கியம். ஒரு நாளில் எத்தனையோ வேலைகள் உங்களுக்கு இருக்கலாம். ஆனால் மிக முக்கியமான வேலை என்று ஒன்றை மட்டும் பட்டியலிடுங்கள். அவற்றை முதலில் முடித்து விடுங்கள். அதன்பின், மற்றவற்றைச் செய்ய உங்களுக்கு உற்சாகம் தானே பிறக்கும்.

நாள் முழுவதும் காரியங்களைத் தள்ளிப் போடாமல் சாதகமாகச் செய்ய வேண்டுமென்றால், அதற்கு விடியற்காலை விசேஷமானது என்று பார்த்தோம். விடியற்காலையைப் பயன்படுத்திக் கொள்ள மிகவும் உகந்த வழி, இரவு விரைவிலேயே உறங்கப் போவதுதான். தூங்குவதற்கு இரண்டு மணி நேரங்கள் முன்பே தொலைக்காட்சி- கணினி ஆகியவற்றைத் தவிர்த்துவிடுங்கள்.

தள்ளிப் போடத் தூண்டும் சோம்பல், உங்களைவிட்டுத் தள்ளிப் போகும். தள்ளிப் போடாதீர்கள் துள்ளியெழுங்கள்.

– மரபின் மைந்தன் ம.முத்தையா

நினைத்தது போலவே வெற்றி என்னும் நூலிலிருந்து..

24. எதிர்வரும் நாளை எதிர்கொள்ளத் தயாரா…?

ஒவ்வொரு நாளிலும் ஏதோவொரு சுவாரசியம் இருக்கத்தான் செய்கிறது. வாழ்வின் ஒவ்வோர் அங்குலமும் அர்த்தத்தாலும் அழகாலும் அபூர்வமான நிகழ்வுகளாலும் நிரம்பியிருக்கிறது. சாதாரண நாள் என்று ஒன்று அந்த உலகம் தோன்றிய நாள் தொட்டு உதிக்கவேயில்லை.

நம்மில் இருக்கும் உணர்வும் உற்சாகமும் திட்டமிடுதலும், செயல்படுத்துதலும்தான் ஒரு நாளில் நாம் என்னபெறுகிறோம் என்பதைத் தீர்மானிக்கிறது. ஒவ்வொரு நாளையும் எதிர் கொள்ள அதற்கு முதல் நாளே நாம் தயாராக வேண்டும். இதில் மிக முக்கியம், ஒரு நாளோடு நம்மை எப்படித் தொடர்பு படுத்திக் கொள்கிறோம் என்பதுதான். உதாரணமாக, வணிகம் – கலை – தொழில் -கண்டுபிடிப்பு என்று ஒவ்வொரு நாளும் ஏதோ ஒன்று நிகழ்ந்திருக்கும்.

பங்குச் சந்தையில் பணம் போடுவது பற்றி ஒரு நண்பர் திட்டமிட்டுக் கொண்டிருந்தார். அன்று மார்ச் 13, அந்தத் தேதியின் முக்கியத்துவம் என்னவென்று கூகுளில் தேடினார். பட்டியலிடப் பட்ட பல முக்கியங்களில் ஒன்று அவர் கண்களைக் கவர்ந்தது. 1986ல் மைக்ரோசாப்டின் பங்குகள் முதல் முதலாக வெளியிடப்பட்டது மார்ச் 13ம் தேதி தான்!! காலையில் ஒரு பங்கின் விலை 21 டாலர்கள் இருந்தன. மாலையில் அதன் விலை 28 டாலர்களைத் தொட்டன. 14 ஆண்டுகளில் அதாவது 2000 -மாவது ஆண்டில் ஒரு பங்கின் விலை 10,000 டாலர்கள்! இந்த செய்தி அந்த நாளுக் கொரு புதிய முக்கியத்துவத்தை உருவாக்கியது. அந்த மனிதர் உற்சாகமாகிவிட்டார்.

ஒரு நாளை சாதாரண நாள் என்று யாரும் எடைபோடவே முடியாது. ஒவ்வொரு நாளையும் உற்சாகமாக எதிர்கொள்ள வேண்டுமென்றால், அதற்கொரு புதிய வழியைச் சொல்கிறேன்.

முதல் நாள் மாலையே, அடுத்த நாளின் முக்கியத்துவம் என்ன என்பதைக் கண்டறிந்து குறித்துக் கொள்ளுங்கள். அந்த நாளில் யாரேனும் ஒரு முக்கியமான தலைவர் பிறந்திருப்பார். அல்லது இறந்திருப்பார். இல்லையென்றால் ஒரு புதிய கண்டுபிடிப்பு நிகழ்ந்திருக்கும். ஒரு மகத்தான நிறுவனம் தொடங்கப்பட்டிருக்கும். ஏதேனும் சாதனை செய்யப்பட்டிருக்கும்.

இப்படி எத்தனையோ அம்சங்களை உலகம் ஒவ்வொரு விடியலிலும் கண்டிருக்கிறது. உதாரணமாக ஏப்ரல் ஒன்றாம் தேதியை எடுத்துக் கொள்ளுங்கள். உலகத்தையே ஆட்டிப் படைக்கும் அமெரிக்காவின் டாலர் சின்னமாகிய $ உருவாக்கப்பட்ட நாள் ஏப்ரல் ஒன்று! இது முட்டாள்கள் தினமல்ல. முக்கியமான தினம். இப்படி ஒவ்வொரு நாளைப் பற்றியும் முன் கூட்டியே தெரிந்து கொண்டு, முதல் நாளோ, சில நாட்கள் முன்னரோ அதை உங்கள் நாள் குறிப்பேட்டில் குறித்துக் கொள்ளுங்கள்.

காலையில் உங்கள் நாள் குறிப்பேட்டைப் பார்த்ததுமே இந்த நாள் ஒரு முக்கியமான நாள் என்பதை உணர முடியும். உங்கள் நண்பர்களுக்குக் குறுஞ்செய்தி மூலம் அந்த நாளின் முக்கியத்துவத்தை உணர்த்துங்கள். ஒவ்வொரு தினத்தையும் மகிழ்ச்சியுடனும் மலர்ச்சியுடனும் எதிர்கொண்டு புதிய முக்கியத்துவத்தை அந்த நாளுக்கு உங்கள் உழைப்பாலோ, படைப்பாலோ உருவாக்க முற்படுங்கள்.

ஏப்ரல் மாதத்தின் முக்கியமான சில நிகழ்ச்சிகளை இங்கே உங்களுக்காக….. பட்டியலில் விடுபட்ட தேதிகளின் முக்கியத்துவத்தை விருப்பமாய்த் தேடி நிரப்புங்களேன்!

ஏப்ரல் 1
இன்று உலக நாடுகளின் கரன்சிகளை உலுக்கி எடுக்கிற சின்னம், $ இந்த சின்னம் பிறந்த தினம் ஏப்ரல் 1. ஆலிவர் போலாக் என்ற தொழிலதிபர் 1778 ஏப்ரல் 1இல் இந்தச் சின்னத்தை உருவாக்கினார்.

ஏப்ரல் 2
டூபான்ட் நிறுவனத்தில் வேலை பார்த்த ராய் ப்ளங்கட், குளிர்வாயு ஒன்றைப் பரிசோதித்த போது, கன்டெய்னர் ஒன்றின் மூடிகளில் இழையிழையாய் ஒட்டியிருந்த ரசாயனம் ஒன்றை எதேச்சையாகக் கண்டறிந்தார். இன்று விண்கலங்கள் தொடங்கி மைக்ரோசிப் உட்பட பல இடங்களில் பயன்படும் டெஃப்லான் கண்டறியப்பட்ட தினம் 1938 ஏப்ரல் 6.

ஏப்ரல் 9
கம்ப்யூட்டர் உலகின் தந்தை என்றறியப்படுபவர், ஜான் ப்ரெஸ்பர் எகெர்ட். 1946இல், முதல் எலக்ட்ரானிக் டிஜிட்டல் கம்ப்யூட்டரை அறிமுகம் செய்தார். 3 டன் எடையுள்ள இந்த எந்திரம் ஓர் அறை முழுக்க நிரம்பி வழிந்தது. இந்த அறிவியல் அற்புதத்தை நிகழ்த்திய ஜான் ப்ரெஸ்பர் எகெர்ட், 1919 ஏப்ரல் 9ஆம் தேதி பிறந்தார்.

ஏப்ரல் 11
மெக்ஸிகோ சென்றிருந்த தாமஸ் ஆடம்ஸ், சபோடில்லா மரத்தில் இருந்த சிகில் என்ற கோந்துப் பொருளைக் கண்டார். அதை ரப்பராக்க முயற்சித்துத் தோற்றவர், அதை உணவுப் பொருளாக்கினார். “அப்படியே மெல்ல” யாரும் தயாரில்லை. சர்க்கரையும் நறுமணமும் கலந்தார். அப்படி உலகின் முதல் சூயிங்கம் உருவான நாள் 1846 ஏப்ரல் 11.

ஏப்ரல் 13
தப்புந்தவறுமாய் கிளார்க் வேலை பார்த்த அந்த இளைஞரை, மலிவு விலை பொருள் விற்கும் இடத்திற்கு முதலாளி மாற்றினார். அங்கே தன் திறமையைக் கண்டறிந்த இளைஞர் முதலாளியிடம் 315 டாலர்கள் கடன் வாங்கி மலிவு விலை கடைகளைத் தொடங்கினார். 1919இல் அவர் இறக்கும்போது அமெரிக்கா முழுவதும் 1000 கடைகளை உருவாக்கியிருந்தார். பூல்வொர்த் ஸ்டோர்ஸ் உரிமையாளர் ஃபிராங்க் வின்ஃபீல்ட், பிறந்த தினம் 1952 ஏப்ரல் 13.

ஏப்ரல் 17
வேலைக்கு ஆட்கள் கிடைப்பதில் தட்டுப்பாடு நிறைந்த காலம். 1944 ஏப்ரல் 17இல் சியாட்டில் பகுதியில் வசித்த உணவக உரிமையாளர் ஒருவர், வேடிக்கையாகவும் வேதனையாகவும் ஒரு விளம்பரம் கொடுத்திருந்தார். “என் உணவகத்தில் பாத்திரங்கள் கழுவப் பெண் வேண்டும். தேவைப்பட்டால் அவரைத் திருமணம் செய்து கொள்கிறேன்.”

ஏப்ரல் 24
உலக வரலாற்றில் முதல் முறையாக 750 அடிக்கும் அதிகமான முதல் வணிகக் கட்டிடம் நியூயார்க்கில் திறக்கப்பட்டது. வாஷிங்டன்னில் இருந்தபடி அமெரிக்கா அதிபர் வூட் ரூ வில்ஸன் பொத்தானை அமுக்கியதும், 55 தளங்களில் இருந்த 80,000 விளக்குகள் ஓளிவீசின. 792 அடி உயரமான இந்தக் கட்டிடத்தைவிட உயரமான ஒரே கட்டிடம் உலக அதிசயமான ஈஃபிள் டவர். 1913ம் ஆண்டில் இது நிகழ்ந்தது.

ஏப்ரல் 27
1970 ஏப்ரல் 27ல் உலகின் முதல் ஏ.டி.எம், அமெரிக்காவில் உள்ள லாஸ் ஏஞ்சல்ஸில் தொடங்கப்பட்டது. கண்காணிப்பு கேமராக்கள் பொருத்தப்பட்டிருந்தன. 1980ல் ஏப்ரல் 27ல் ஜெராக்ஸ் நிறுவனம், மவுஸ் உடன் கூடிய முதல் கம்ப்யூட்டரை அறிமுகம் செய்தது.

ஏப்ரல் 28
இந்திய புராணங்களில் பேசப்படும் வெள்ளை யானை பற்றிக் கேள்விப்பட்ட பி.டி.பர்னம், தன் சர்க்கஸிற்கு ,வெள்ளை யானை என்ற பெயரில் பழுப்பு நிற யானை ஒன்றை வாங்கி 1884 ஏப்ரல் 28ல் அறிமுகம் செய்தார். எல்லோரும், அதைப் பார்த்து ஏமாற்றம் அடைய, அவரது போட்டியாளர் ஆடம் ஃபோர்பா தன் சர்க்கஸில் வெள்ளை யானை ஒன்றைக் கொண்டு வர, பெரும் கூட்டம் அலை மோதியது. புலனாய்வுச் செய்தியாளர் மூலம், அது வெள்ளை வண்ணம் பூசப்பட்ட யானை என்து வெளியானது.

– மரபின் மைந்தன் ம.முத்தையா

நினைத்தது போலவே வெற்றி என்னும் நூலிலிருந்து…

23. உங்கள் குழந்தைகளும் சாதிப்பார்கள்! – 2

சின்னக் குழந்தைகளை மட்டுமின்றி பதின் பருவத்துக்கு முன்னும் பின்னும் இருக்கும். குழந்தைகளை நாம் எப்படி நடத்துகிறோம் என்பதில் தங்களை பெரியவர்கள் எப்படி எடைபோடுகிறார்கள் என்பது வெளிப்படுகிறது.

குழந்தைகளிடம் இயல்பாக, இனிமையாக நீங்கள் விருந்தினர்கள் முன்னிலையில் நடந்து கொண்டால் விருந்தினர்களும் அதுபோல் நடந்து கொள்வார்கள். வீட்டுக்கு வருபவர்கள் பலரும், ஏதோ விசாரணைக் கமிஷன் நீதிபதிகள் போல் குழந்தைகளிடம் பரீட்சை பற்றியும் மதிப்பெண் பற்றியும் மட்டுமே கேட்பார்கள். இவை தவிர குழந்தைகளின் உலகத்தில் எத்தனையோ, விஷயங்கள் இருக்கின்றன. எனவே குழந்தைகளை இயல்பாக நடத்துங்கள், விருந்தினர்களும் அப்படியே நடந்து கொள்வார்கள்.

அடுத்தது, குழந்தைகளை அவர்கள் செயல்களின் மூலம் அடையாளப்படுத்தாதீர்கள். குழந்தைகளிடம் நீங்கள் காட்டுகிற அடிப்படையான, அன்பை அவர்களின் தவறுகள் நிமித்தமாய் நிறுத்திக் கொள்ளாதீர்கள். “உன் மார்க் குறைந்து விட்டது. அம்மா ஒரு வாரத்துக்கு உன்னிடம் பேச மாட்டேன்” என்பது அபத்தத்திலும் அபத்தமான தண்டனை.

தவறு செய்தாலும், தன அடிப்படையான உறவை பெற்றோர்கள் தகர்த்துக்கொள்ள மாட்டார்கள் என்பது பிள்ளைகளுக்குக் கொடுக்க வேண்டிய நம்பிக்கை. அப்போதுதான் குழந்தைகளிடம் பாதுகாப்புணர்வு தோன்றும்.

பகலில், என்ன விஷயமாக நீங்கள் பிள்ளைகளைக் கண்டித்திருந்தாலும் சரி, இரவு உறங்கப் போகும் முன்னால், அந்தக் குற்றவுணர்வை மாற்றிவிடுங்கள். சிரித்துப் பேசியோ, சினிமா போன்ற விஷயங்கள் குறித்து ஜாலியான ஒரு விவாதத்தை நடத்தியோ பிள்ளைகளை இயல்பு நிலைக்குக் கொண்டு வாருங்கள்.

தவறு அவர்கள் மேல் இருந்து நீங்கள் திட்டியது நியாயம் என்றாலும் நம்பிக்கையை – சிதைக்கும் விதமாய் எதையும் எக்காரணம் கொண்டும் செய்யாதீர்கள்.

சுதந்திரம் குழந்தைகளுக்கு சரியாக வழங்கப் படும்போது அதுவே சுய கட்டுப்பாட்டையும் உருவாக்கிவிடும். விளையாட்டுக்கான நேரம் படிப்புக்கான நேரம் என்பதில் பல பெற்றோர்கள் தவறு செய்வார்கள். மாலை ஐந்து முதல் ஆறு, விளையாட்டுக்கான நேரம் என்று வைத்துக் கொள்ளுங்கள். ஐந்து மணிக்கு விளையாடப் போகும்போதே “ஆறு மணிக்குப் படிக்க வரணும்! தெரியுமில்லே” என்று பயமுறுத்தி அனுப்பினால், ஆறுமணிக்கு வருவதை ஆனவரை தள்ளிப் போடவே குழந்தைகள் விரும்பும். இரண்டுக்கும் சமமான முக்கியத்துவத்தை பெற்றோர்கள் தரவேண்டும். “உன் விருப்பத்துக்காக விளையாடு! என் விருப்பத்துக்காகப் படி!” என்பது நீங்கள் தருகிற தவறான சமிக்ஞை . பெற்றோர்கள் தங்களைப் பற்றிப் பெருமையாக நினைக்கிறார்கள் – பாராட்டுகிறார்கள் – தங்களை நம்புகிறார்கள் – என்பதைக் குழந்தைகள் உணர்ந்தாலே அவர்களின் செயல்திறன் கூடுகிறது. பொறுப்பு வளர்கிறது.

படிப்பைப் போலவே மற்ற திறமைகளும் முக்கியம் என்பதைப் பெற்றோர்கள் உணர்ந்து கொள்வதும், உணர்த்துவதும் முக்கியம்.

சின்னச் சின்ன அக்கறையிலேயே குழந்தைகள் மகிழ்ந்துவிடுவார்கள். வெளியே சொல்ல மாட்டார்களாக இருக்கும். ஆனால் மனதுக்குள்ளே மகிழ்வார்கள். தங்களைத் தாங்களே திருத்திக் கொள்வார்கள். உங்கள் எதிர்பார்ப்பில் இருக்கிற நியாயத்தைப் புரிந்துகொண்டு தங்களை சீரமைத்துக் கொள்வார்கள்.

நம்புங்கள்…. உங்கள் குழந்தைகளும் சாதிப்பார்கள்!!!

– மரபின் மைந்தன் ம.முத்தையா

நினைத்தது போலவே வெற்றி என்னும் நூலிலிருந்து…

23. உங்கள் குழந்தைகளும் சாதிப்பார்கள்! – 1

ஒரு குழந்தைக்கு, தன்னைப்பற்றிய அபிப்ராயமும், தன் தகுதிகள் குறித்த அறிமுகமும் பெற்றோர்களின் பாராட்டிலிருந்தோ வசவில் இருந்தோ பிறக்கிறது. சின்னத்தவறொன்றுக்கு “அட மக்குப் பயலே!” என்று தலையில் குட்டு வாங்கும்போது குட்டு, தலையில் பதிகிறது. ஒரு மக்கு என்கிற எண்ணம் மூளையில் பதிகிறது.

அக்கறையாலும் அன்பாலும், குழந்தை திருந்த வேண்டும் என்ற தவிப்பிலும்தான் எல்லாப் பெற்றோரும் கண்டிக்கிறோம். ஆனால் குழந்தைகள் மனதில் என்ன பதிவை விடுகிறோம் என்பதுதான் முக்கியம்.

உங்கள் குழந்தை சராசரியாகப் படிக்கிறதா? இன்னும் படுக்கையை நனைக்கிறதா? சொன்னதைக் கேட்க மறுக்கிறதா? சொல்வது காதில் விழுவதே இல்லையா? விருந்தினர் வந்தால் எழுந்து உள்ளே போய்விடுகிறதா? சகஜ பாவமில்லாமல் சங்கோஜ மாய் வளர்கிறதா? இத்தனை இருந்தாலும்….நம்புங்கள்? உங்கள் குழந்தையும் சாதிக்கும். படிப்படியாய் சில முயற்சிகளை மிக இயல்பாகவும் நிதானமாகவும் வீட்டில் நாம் எடுத்தால்போதும். ஒரு தாவரம் துளிர்விட்டுத் தளிர்விட்டு வளர்வதைக் கண்கூடாகப் பார்ப்பது போல் குழந்தையின் வளர்ச்சியைக் காண முடியும்.

முதலாவதாக, தாங்கள் பிறந்து வளர்ந்த குடும்பம் – பாரம்பரியம் குறித்தெல்லாம் குழந்தைகள் தெரிந்துகொள்வது முக்கியம். பணத்தை மையப்படுத்தியே வாழ்வதாய் கருதப்படுகிற மேலை நாடுகளில்கூட FAMILY TREE என்று தங்கள் வேர்களைத் தேடும் வேலையில் இளைய தலைமுறை இறங்கியிருக்கிறது.

தாத்தா பாட்டி – அவர்களுக்கும் முந்தைய தலைமுறை – அவர்கள் செய்துவந்த தொழில்& அவர்களுடைய ஆளுமை – அவர்கள் வாழ்வில் நடந்த சுவையான சம்பவங்கள் போன்றவை குறித்தெல்லாம் குழந்தைகளுக்கு உற்சாகமாக சொல்லுங்கள். தன்னுடைய பரம்பரை குறித்த அறிவு மனதுக்குள் மிகுந்த நம்பிக்கைய வளர்க்கும். ஒரு வேளை முன்னோர்கள் சிரமப்பட்டு உயர்ந்திருந்தால்கூட அவர்கள் கதையே ஒரு முன்னுதாரணமாய் அந்த இளம் இதயங்களில் நிலைக்கும். கடந்த கால உறவுகள் பற்றிய தகவல்களும், நிகழ்வுகால உறவுகள் உடனான நேரடி அறிமுகமும் குழந்தைகளுக்கு மிகவும் அவசியம். “எங்கே சார்! உறவுகள் வந்தால் ஓடி ஒளிந்து கொள்கிறார்கள்! என்று நீங்கள் கேட்கலாம்.

கோவையில், ‘சிகரம் உங்கள் உயரம்’ அமைப்பின் கிளை அமைப்பாகிய வளரும் சிகரங்கள்’ குழந்தைகள் அமைப்பின் உறுப்பினர்களுடன் உரையாடிக் கொண்டிருந்தேன். இதே பிரச்சினையை அவர்கள் முன் வைத்தேன். 27 குழந்தைகளில் பெரும்பாலானவை சொன்ன பதில் சுவாரசியமாக இருந்தது.

“என்னுடன் இவ்வளவு கலகலப்பாகப் பேசுகிறீர்களே! உறவினர்கள் வந்தால் ஏன் ஓடி ஒளிகிறீர்கள்?” என்பது நான் கேட்ட கேள்வி. அதற்குக் குழந்தைகள் சொன்ன பதில், “நீங்கள் எங்ககிட்டே ஃபிரண்ட் மாதிரி பேசறீங்க அங்க்கிள்! அவங்க எங்களை அதிகாரமா, “நான் பெரியவன்! தெரிஞ்சுக்கோ”ங்கிற தொனியிலே பேசறாங்க. எங்க அப்பா அம்மாவும் எங்களை அறிமுகப்படுத்தக் கூப்பிடும் போதே நாய்க்குட்டியைக் கூப்பிடற மாதிரி கூப்பிடறாங்க”.

இதுதான் விஷயம். இதுவேதான் விஷயம். குழந்தைகள், தங்களை உரிய மன முதிர்ச்சியுடன் நடத்த வேண்டும் என்று ஓரளவு விவரம் வந்த பிறகு விரும்புவது இயற்கை. இது நியாயமும் கூட நாம் பச்சைக் குழந்தைகளைக் கொஞ்சும்போது அவர்கள் மொழியில் பேச ஆசைப்பட்டு “அப்புக்கண்ணா! புஜ்ஜீக்குட்டி” என்று கொஞ்சுகிறோம். கொஞ்சம் வளர்ந்த குழந்தைகளிடம் நாம் பெரியவர்கள் என்ற வீராப்பைக் காண்பிக்கப் படாதபாடுபடுவோம்.

– மரபின் மைந்தன் ம.முத்தையா

நினைத்தது போலவே வெற்றி என்னும் நூலிலிருந்து…

22. உழைக்கத் தெரிந்த உள்ளம்!

உலகின் மிகச்சிறந்த வெற்றியாளர்களின் உயர்வுக்குப் பின்னால் இடைவிடாத உழைப்பே காரணமாய் இருக்கிறது. இதை அடிமனதில் அடிக்கோடிட வேண்டும் என்றால் உங்களுக்கு வியப்பாக இருக்கும். ஏன் தெரியுமா? அடுத்தவர்களின் உழைப்பை அண்ணாந்து பார்த்து “ஆஹா” என்று பாராட்டும் பலரும், அவரவர் உழைப்பு என்று வரும்போது அலட்சியம் காட்டுகிறார்கள்.

கிராமத்தைச் சேர்ந்த ஒரு பெரியவர், கோவையில் சில உறவினர்கள் மூலம் தன் மகனை நிறுவனமொன்றில் வேலைக்குச் சேர்த்தார். முதல் நாள் அலுவலகத்தில் விட்டு விட்டு அவர் சொன்ன அறிவுரையைக் கேட்க நேர்ந்தது. “வேலை நேரம் சாயங்காலம் ஐந்தாரை மணிவரைக்கும்தான். நேரம் ஆனதுமே மேனேஜர் பார்க்கிற மாதிரி, வாட்சை ஒரு தடவை பார்த்துட்டு எழுந்து வந்திடு. கூடுதலா உட்கார்ந்து வேலைபார்த்தா அப்புறம் அதையே பழக்கமாக்கீடுவாங்க.”

வேலை நேரத்திற்குள் எப்படி திறம்பட உழைக்க வேண்டும், நல்ல பேரெடுக்க வேண்டும் என்பதையெல்லாம் பற்றி அவர் எதுவுமே சொல்லவில்லை.

கடினமான உழைப்பு என்பது நாம் – நமது வளர்ச்சிக்காக நமே விரும்பி மேற்கொள்வது. பணியாளராய் இருந்து கூடுதலாக உழைப்பது; பயிற்சிக்கான வழியே தவிர, அடுத்தவர்களின் ஆதாயத்திற்காக நம் ஆற்றலை அடகு வைப்பதாய் அர்த்தமல்ல. சொந்தமாகத் தொழில் தொடங்கும் வேளையில் இந்தப் பயிற்சி பெரிய அளவில் கைகொடுக்கும்.

பல்லாண்டு காலங்களுக்கு ஒவ்வொரு நாளும் பில்கேட்ஸ் 20 மணி நேரம் உழைத்தார் என்கிறார்கள். கடின உழைப்பு, எங்கு போனாலும் வேலை நிச்சயம் என்கிற உத்திரவாதத்தைத் தருகிறது. உங்கள் துறையின் உச்சம் நோக்கி உங்களை நகர்த்துகிறது. உங்கள் போட்டியாளரை விடவும் பலமடங்கு உங்களை முன்னேற்றுகிறது.

“வேலையில் என் சக்தியை எல்லை தாண்டி நான் வீணடிக்க வேண்டுமா” என்று சிலர் கேட்பார்கள். வேலையைத் தாண்டி அர்த்தமுள்ள பணி உங்கள் வாழ்வில் இருந்தால் அப்படி வீணடிக்க வேண்டிய அவசியம் கிடையாது. ஆனால், எதை நோக்கிச் செல்ல விரும்புகிறீர்களோ அதற்கான வழி உழைப்பு தான் என்பதை உணர்கிற போது உங்களால் வேலையிலும், வேலையைத் தாண்டிய வேறு பணிகளிலும் உற்சாகத்துடன் ஈடுபட முடிகிறது.

“வேலைபார்ப்பது அவ்வளவு சுகமான விஷயமல்ல. ஆனால் சும்மா இருப்பதை விடவும் வேலை செய்வதில் வரும் சிரமம் சுகமானது” என்கிறார் ஒருவர். உண்மைதான்!

சிரமம் பார்க்காமல் உழைப்பவர்கள் சிகரம் தொடுகிறார்கள்.

சோர்வு, சோம்பல், தள்ளிப்போடும் குணம் ஆகிய தடைகளைத்தாண்டி, கடின உழைப்பைக் கைக்கொண்டு சந்தோஷமாய் செயல்பட சில வழிமுறைகள் இதோ:
கடினமான வேலை ஒன்றைசெய்யத் தொடங்கும் முன்பாக, அதைச் செய்து முடித்தால் எவ்வளவு நன்றாக இருக்கும் என்பதையும் அதனால் கிடைக்கக்கூடிய பயன்களையும் கற்பனை செய்யுங்கள். அந்த உற்சாகத்தை உள்வாங்கிக் கொண்டு வேலையைத் தொடங்குங்கள்.

ஒரு பெரிய வேலையை சின்னச் சின்னப் பகுதிகளாகப் பிரித்துக்கொண்டு தொடர்ந்து செய்து கொண்டே வாருங்கள்.

வேலையைத் தொடங்கிவிட்டால் குறிப்பிட்ட நேரம் வரை தொடர்ந்து செய்யுங்கள் உதாரணமாக, அரை மணி நேரம் நீங்கள் உழைக்க முடிவு செய்தால் அந்த அரை மணிநேரம் தொலைபேசி அழைப்பு, வேடிக்கை பார்த்தல், வீண் அரட்டையில் ஈடுபடுதல் போன்றவற்றைத் தவிர்த்துவிடுங்கள்.

அந்த வேலைக்கான உபகரணங்கள் என்னென்ன உண்டோ, அனைத்தையும் தயாராக வைத்துக் கொண்டு வேலையைத் தொடங்குங்கள். தொடங்கிய பிறகு ஒவ்வொன்றாகத் தேடி எடுத்துக் கொண்டிருக்காதீர்கள்.

வேலையை செய்து முடிப்பதற்கான நேரத்தை நீங்களே முடிவு செய்யுங்கள். முடிவு செய்த நேரத்திற்கு முன்னதாகவே செய்து முடியுங்கள்.

எந்த ஒன்றையும் புதிதாகத் தொடங்க வேண்டிய நேரத்தில் மனது தள்ளிப் போடுவது இயற்கை. எப்படியாவது தொடங்கிவிடுங்கள். தொடங்கிய பின்னர் தொடர்வது எளிதாக இருக்கும்.

வேலையின் ஒவ்வோர் அம்சத்தையும் உங்கள் மனதுக்குள் ஒருமுறை ஒத்திகை பார்த்துக் கொள்ளுங்கள். அதன்படி வேலை பார்ப்பது எதிர்பார்த்ததைவிட எளிதாக இருக்கும்.

நீங்கள் நினைத்ததுபோல் அந்த வேலை முழுமை பெறுகிறதா என்பதில் கவனமாக இருங்கள். மற்றவர்களின் – அல்லது – உடன் உழைப்பவர்களின் விருப்பங்களுக்கேற்ப சமரசம் செய்து கொள்ளாதீர்கள்.

ஒவ்வொரு நாளும், வேலைக்கான நேரத்தை சரியாகத் திட்டமிட்டுக் கொள்ளுங்கள். திட்டமிட்டபடி அவற்றைத் துல்லியமாக நிறைவேற்றுங்கள்.

– மரபின் மைந்தன் ம.முத்தையா

நினைத்தது போலவே வெற்றி என்னும் நூலிலிருந்து…

21. உங்கள் விதிகளை உருவாக்குங்கள்!

வாழ்க்கைக்கென்று முன்னோர் வகுத்த விதிகள் எல்லாம் ஒரு பக்கம் இருக்கட்டும். நியாயமான – நிறைவான – நிம்மதியான வாழ்க்கைக்கு என்னென்ன வேண்டும் என்கிற முடிவை நீங்கள் முதலில் எடுங்கள்.

உங்கள் வாழ்வுக்கான விதிகளை மற்றவர்களுக்கு இடையூறில்லாமல் நீங்கள் உருவாக்குங்கள். உங்கள் கட்டுக்குள் உங்கள் வாழ்க்கை இருக்கும்போது இன்னும் தெளிவான முடிவுகளை எடுக்க உங்களால் முடியும்.

சில பேருக்கு அவர்களைப் பற்றிய செய்திகளை மற்றவர்களிடமிருந்து கேட்கும்போது வியப்பாய் இருக்கும். சுயமதிப்பீடு இல்லாத போது இத்தகைய சிரமங்கள் ஏற்படக் கூடும், உங்களை நீங்களே உணர்ந்து கொள்வது மிக முக்கியம். அப்போதுதான் புகழையும் விமர்சனங்களையும் சரியாக எடைபோட்டுத் தேவையானதை மட்டுமே கரத்தில் கொள்ள முடியும். அடுத்தவர்கள் உங்களை உங்களுக்கு அறிமுகம் செய்வதற்குப் பெயர் அடக்கமல்ல அபத்தம்.

எதிர்காலம் பற்றிய களவுகளும் திட்டங்களும் தேவைதான். ஆனால் எதிர்காலம் எங்கே தொடங்குகிறது தெரியுமா? இதோ இந்த நிமிடத்தில் தொடங்குகிறது. இப்போது நீங்கள் எதைச் செய்கிறீர்களோ அதன் பயனைத்தான் எதிர் காலத்தில் அனுபவிக்கப் போகிறீர்கள். நிகழ்காலத்தில் நீங்கள் நிகழ்த்துவதுதான் எதிர்காலமாய் முதிர்கிறது. “செய்யலாம் என்று நினைத்துக் கொண்டேயிருந்தேன் – முடியவில்லை” இதுதான் தங்கள் இலட்சியங்களை விட்டுத் தள்ளி வந்தவர்கள் வருந்திச் சொல்கிற வாக்குமூலம். எனவே நிகழ்காலத்திலிருந்து தொடங்கட்டும் உங்கள் எதிர்காலம்.

சிரமங்களுக்கும் சிக்கல்களுக்கும் நடுவே வாழ்வை ரசிப்பதற்கான காரணங்களை யாரெல்லாம் கண்டுணர்கிறார்களோ, அவர்களின் உறவும் உற்ற துணையும் வாழ்வெல்லாம் உடன் வருமாறு உறுதி செய்து கொள்ளுங்கள். வாழ்க்கை பற்றிய வருத்தமும் விரக்தியும் எங்கும் பரவச் செய்வதால் எந்தப் பயனும் கிடையாது. அதை உங்கள் வாழ்வின் முக்கியமான அம்சமாகக் கைக் கொள்ளுங்கள்.

உங்கள் சக்தியும் நேரமும் பெருமளவில் பறிபோவது, வேண்டாத விவாதங்களில்தான். ஒபாமாவின் வெற்றியில் தொடங்கி, உள்ளூர் வெட்டுகுத்து வரை எல்லாவற்றிலும் தங்களுக்கு எல்லாம் தெரிந்தது போல் சிலர் தப்புத்தப்பான தகவல்களைத் தந்து கொண்டிருக்கக்கூடும். அவர்களை மறுத்துப் பேசி உங்களுக்கு யாரும் மகடம் சூட்டப் போவதில்லலை. அத்தகைய விவாதங்களையும் விவாதம் செய்பவர்களையும் தவிர்த்து விடுங்கள்.

முன்முடிவுகள், உறவின் பாதையில் முட்களாகக் குத்தும். அவை பெரும்பாலும் தவறாகத்தான் இருக்கும். மற்றவர்களின் உண்மையான இயல்புகளைக் காணவும் விடாமல் கண்களைக் கட்டுபவை முன்முடிவுகள். அவற்றைத் தவிர்த்துவிடுங்கள். சகமனிதர்களை எடைபோட்டு, இவர்கள் இப்படித்தான் என்று தீர்மானங்கள் செய்யும் முன்னே நடுநிலையோடு பாருங்கள். யாரிடமும் நல்லதைத் தேடுங்கள். உறவுகள் மிக விரைவாய் தேடுங்கள். உறவுகள் மிக விரைவாய் மேம்படுவதை நீங்களே உணர்வீர்கள்.

ஏற்கனவே என்னவெல்லாம் தெரிந்து வைத்திருக்கிறீர்களோ, அவற்றிலிருந்து மேலும் தெரிந்துகொள்ள முயலுங்கள். நீங்கள் எதிர் பார்த்ததைவிட வேகமாய் புதிய விஷயங்களைக் கற்றுக்கொள்ள உங்களால் முடியும் என்பதை உணர்வீர்கள். வளர்வதற்குப் பெயர்தான் வாழ்க்கை. புதிதுபுதிதாய் கற்றுக் கொள்ள உங்கள் தயக்கமோ உங்களைப் பற்றிய தவறான உங்கள் ம,திப்பீடுகளோ தடையாய் இருக்க அனுமதிக்காதீர்கள்.

வாழ்க்கை மனிதர்களால் ஆனது. கடமைகள், அலுவல்கள் அனைத்துமே சக மனிதர்களுடன் பகிர்ந்து கொள்ளும் சந்தோஷத்துக்கான பாதைகள். அதை வாழ்வின் எல்லா நேரங்களிலும் நினைவில் வைத்திருங்கள். உயர்ந்த விதிகளை உருவாக்கும் சுதந்திரம் உங்களுக்கு உள்ளது. அது உயர்ந்ததாகவும் உபயோகமானதாகவும் இருந்தால் உலகமே உங்களை உற்சாத்தோடு பின்பற்றும்.

– மரபின் மைந்தன் ம.முத்தையா

நினைத்தது போலவே வெற்றி என்னும் நூலிலிருந்து…

20. வெற்றியாளர்களின் அசத்தல் கருவூலம்!

வெற்றியாளர்களிடம் இந்தச் சமூகம் அறிய விரும்புவது என்ன? அவர்கள் வரவேற்பறையில் அடுக்கப்பட்டிருக்கும் விருதுகளின் எண்ணிக்கையா? இல்லை! அவர்களின் கையிருப்பில் உள்ள தொகை எவ்வளவு என்கிற கணக்கையா? இல்லை அவர்களை வெற்றியாளர்களாய் வளர்த்தெடுத்த உந்துசக்தியையும், சரிவுகளை சந்தித்தபோது அவர்களை நிமிரவைத்த நெஞ்சுரத்தின் அடித்தளத்தையும் சந்தித்த சவால்களையும்தான் இந்த சமூகம் அறிய விரும்புகிறது.

அகமதாபாத் ஐஐஎம் நிறுவனத்தில் பட்டம் பெற்ற 25 பட்டதாரிகளின் வாழ்க்கைக்குள் நுழைந்து விதம் விதமாய்த் தொழில் புரிந்து வெற்றி பெற்றவரலாற்றை விளக்குகிற புத்தகம்,“STAY HUNGRY STAY FOOLISH”

இதில் பதிவாகியிருப்பவை – வியர்வை, கண்ணீர், நெஞ்சுரம், நம்பிக்கை, சமயோசிதம், கடின உழைப்பு  இன்னும் எத்தனையோ வழி காட்டுதல்கள்.

சொந்தமாகத் தொழில் தொடங்க வேண்டும் என்ற கனவைச் சுமந்துகொண்டிருந்த சஞ்சீவ் பிக்சந்தனி, அப்போது வேலையில்தான் இருந்தார். நொர்விக்ஸ் நிறுவனத்தில் விற்பனையாளர் வேலை. அவரது சக பணியாளர்களில் பெரும்பாலானவர்கள் பிஸினஸ் இந்தியா இதழைப் படிப்பது வழக்கமான வேலையாகவே ஆகி விட்டதை சஞ்சீவ் கவனித்தார். வேலை வாய்ப்புப் பகுதிகளைத்தான் அவர்கள் விருப்பத்துடன் வாசித்துக் கொண்டிருந்தார்கள். வேலையில் இருப்பவர்கள் வேலை இல்லாதவர்கள் என்ற இருதரப்பினரையும் ஈர்ப்பவை புதிய வேலை வாய்ப்புகள் என்பதை சஞ்சீவ் புரிந்து கொண்டார். அப்போதுதான் வலை தளம் என்ற ஒன்று உருவாகிக் கொண்டிருந்தது. ஆனால் அனைத்து சர்வர்களும் அமெரிக்காவில் தான் இருந்தன.

விதம்விதமாய் முயற்சிகள் செய்து, எங்கெல்லாம் வேலை வாய்ப்புகள் உண்டு என்ற தகவல்களைத் திரட்டி நிமிர்வதற்குள் சஞ்சீவின் முயற்சியால் சர்வர் ஒன்றும் கிடைத்தது.

அப்போது இந்தியா முழுவதும் பார்த்தால் மொத்தமாக இருந்தவை 14,000 மின்னஞ்சல் முகவரிகள் மட்டும்தான். ஆனாலும் வேலை வாய்ப்பு விளம்பரங்களையும் தகவல்களையும் வலை தளம் மூலம் வெளியிட நினைத்தார் சஞ்சீவ். அதன் விளைவாக உருவானதுதான் www. Naukri.com, இன்று மிகப்பெரிய வெற்றியைக் கண்டுள்ள இந்த வலைதளம், சவால்களையும் பின்னடைவுகளையும் சந்தித்து, சமாளித்து பெரிய வெற்றி களைப்பெற்றிருக்கிறது. “உங்கள் தொழிலை நீங்கள் நேசித்தால் – அது உங்கள் வாழ்வுக்கு அர்த்தம் தருவதாகவும் இருந்தால் – சிரமமான சூழல்களையும் சிரித்துக் கொண்டே கடந்துவிடமுடியும்” என்று சொல்கிற சஞ்சீவ் பிக்சந்தனி ஓடாதவரை உங்களைத் தோல்வியாளர் என்று யாரும் சொல்ல இயலாது” என்கிறார்.

“உங்கள் கனவுத் தொழிலை விரைவில் தொடங்குங்கள். சிறிய அளவில் இருக்கும்போது செய்யும் தவறுகள் பெரிய அளவில் பாதிக்காது” என்பது இவர்தரும் ஆலோசனை.

சொந்தத் தொழில் தொடங்கும்போது எந்த அளவுக்கு ரிஸ்க் எடுக்கலாம் என்பது எல்லோருக்கும் வருகிற கேள்வி. “தொழில் முனைவோருக்கு ஆதரவாகத்தான் அந்த நிலை பெரும்பாலும் இருக்கும். எனவே துணிந்து ரிஸ்க் எடுங்கள்” என்கிறார் சந்தனு பிரகாஷ். ‘எட்யுகாம்ப்’ சொந்தமாக அலுவலகம் போட்ட போது அதில் ஒரு மின்விசிறிகூடக் கிடையாது. ஆனால் அது குறித்தெல்லாம் கவலைகொள்ளாமல் தன் கனவைக் கட்டமைக்கத் தொடங்கினார். 2007 – 2008 ல் அவருடைய நிறுவனத்தின் விற்றுவரவு 276 கோடிகள். ஆதாயம் 70 கோடிகள்.

எந்தத் தொழிலைத் தொடங்கினாலும் இரண்டு கேள்விகள் கேட்கச் சொல்கிறார் இவர்.

1. உங்கள் தொழில் அளவுகோல்களுக்கு உட்பட்டதா?

2. உங்கள் சந்தை வாய்ப்புகள் போதிய அளவு விரிவானதா?

இந்தத் தொழில் என்றில்லை. பிடித்தமான தொழிலைப் பிரியமாகச் செய்யத் தொடங்கினால் பெரும் வெற்றிகளை பெறலாம் என்று உற்சாக மூட்டுகிறார் சந்தணு பிரகாஷ்.

“உங்கள் தொழிலில் உங்களுக்கு நம்பிக்கை இருந்தால், பாதியிலேயே விட்டுவிடாதீர்கள். ஒருநாள் நிச்சயம் வெள்வீர்கள். பாதிப்பு வருகிற நேரத்தில் பொறுமையாய் இருங்கள். உடனிருப்ப வரையும் உற்சாகமூட்டுங்கள். உங்கள் தொழிலுக்குத் தேவைப்படுவதைவிட 50% கூடுதல் நிகர ஆதாரத்திற்கு ஏற்பாடு செய்யுங்கள்” என்கிறார், டெகா இண்டஸ்ட்ரீஸ் நிறுவனர் மதன் மோஹன்கா.

ஏகலைவா என்ற பெயரில் கல்வி நிறுவனம் தொடங்கிய சுனில் ஹண்டாவின் பார்வை வித்தியாசமானது. “ஒருவர் நல்ல நிர்வாகியா என்று தெரிய வேண்டுமென்றால், 3-வருடங்கள் கழித்து அவருக்கு கீழே பணிபுரிந்தவர்கள் எங்கே எப்படி இருக்கிறார்கள் என்று பாருங்கள். அவர்கள் நல்ல நிலையில் இருந்தால் அந்த வளர்ச்சியில் அவர்களுடைய மேலாளருக்கும் பங்குண்டு” என்கிறார்.

அதிர்ஷ்டம் முக்கியம்தான். ஆனால் முயற்சி இல்லாதவர்களுக்கு அதிர்ஷ்டம் வருவதில்லை என்கிறார் இவர். இணையம்வழி பயணச் சீட்டுகள் பதிவு செய்தல் என்னும் துறையில் வெற்றியோடு திகழும் தீப் கேல்ரா makemytrip.com நிறுவனத்தின் உரிமையாளர். “உங்களுக்கான துறை போதிய நிதிக்கு வாய்ப்புள்ளதா என்று பரிசீலனை செய்யுங்கள். உங்கள் முதலீட்டை சரியாகத் திட்டமிடுங்கள். உங்கள் பணியாளர்களுக்குப் போதிய பயிற்சி கொடுங்கள். வெளிப்படையான நிர்வாகத்திற்கு இடம் கொடுங்கள். ஒவ்வொரு நாளிலும் தொழிலில் கவனமாக இருங்கள்” என்பது இவர் தரும் வழிகாட்டுதல்.

“எடுத்த முயற்சியில் எல்லாம் இருந்தாலும் அடுத்த தொழிலைத் தொடங்கவோ வேலையில் சேரவோ அஞ்சாத மனநிலை இருப்பவரே தொழில் தொடங்கத் தகுதியானவர்” என்கிறார் இண்டியா இன்ஃபோ லைன் உரிமையாளர் நிர்மல் ஜெயின். நேராகத் தொழில் தொடங்கும்முன் சில நிறுவனங்களில் வேலை பார்ப்பது நேரடி அனுபவத்தைத் தந்து உங்களைத் தலைசிறந்த நிர்வாகியாக்கும்” என்கிறார் இவர்.

வீடுகளின் உச்சியில் எல்லாம் தண்ணீர் தொட்டியாய் உட்கார்ந்திருக்கும் ‘சின்டெக்ஸ்’ நிறவனத்தின் வெற்றிக்குக் காரணம், தனஞ்செயன். அவர் இந்நிறுவனத்தின் உரிமையாளர் அல்ல. 34 ஆண்டுகளாய் அதனை நிர்வகித்துவரும் முதன்மை அலுவலர். ‘வளர்ப்புக் குழந்தையை வாஞ்சையுடன் அரவணைக்கும் தந்தை’ என்கிறார். இவர் 1974ல் சின்டெக்ஸ் நிறுவனத்தின் முழு நிர்வாகம் இவரிடம் ஒப்படைக்கப்பட்டது. முழுமையான சுதந்திரமும் வழங்கப்பட்டது. 1975ல் 3 இலட்சங்கள் விற்றுவரவு செய்த நிறுவனம், அடுத்த ஆண்டே 20 இலட்சங்களும், 1977ல் 70 இலட்சங்களும் விற்று வரவுசெய்து வெற்றிப் பயணத்தைத் தொடங்கியது.

ரிஸ்க் எடுப்பதும், தவறுகளுக்குப் பொறுப்பேற்பதும் வளர்ச்சிக்கு வழிகள் என்கிறார் இவர். பிடித்ததையே செய்யுங்கள்” என்பது இவர் சொல்லிக் கொடுக்கும் வெற்றிச் சூத்திரம்.

ஏட்டுப் படிப்பும் அனுபவமும் கைகோர்க்கும் போது ஏற்படும் வளர்ச்சிக்கு, எத்தனையோ மைல் கற்கள், அத்தனை மைல்கற்களையும் பட்டியல் போடும் இந்தப் புத்தகம் தொழில் முனைவோர்களுக்கு ஒரு நல்ல துணை.

– மரபின் மைந்தன் ம.முத்தையா

நினைத்தது போலவே வெற்றி என்னும் நூலிலிருந்து…