பறந்துவிடு

வானவெளியில் பறவைக்கு
வேலை எதுவும் கிடையாது!
ஆன பொழுதும் பறக்கிறதே
அது போல் நமக்கேன் முடியாது?

கூடு இருப்பது மரக்கிளையில்
கொள்ளும் தானியம் சமவெளியில்
பாடித் திரிந்து பறப்பதெல்லாம்
பரந்து கிடக்கிற வான்வெளியில்!

வாழ்க்கை பூமியில் நிகழ்ந்தாலும்&
வான்வரை நீளுக உன் இலக்கு!
தாழ்ந்த எண்ணங்கள் துரத்திவிடு
திசைகள் எட்டும் இனிஉனக்கு!

சின்னக் கவலைகள் மறந்துவிடு
சிறகுகள் வீசிப் பறந்துவிடு!
உன்னை நீயே கடந்துவிடு
உயரம் தொட்டபின் கரைந்துவிடு!