தாங்கிக்கொள்

பூக்கும் வரையில் அரும்பின் நறுமணம்
பூமிக்குத் தெரியாது!
ஊக்கம்கொண்டவன் உன்மனக் கனவுகள்
ஊருக்குப் புரியாது!

கருவறைக்குள்ளே குழந்தை வளர்வது
கடவுளின் ரகசியம்தான்!
தருணம் வரும்வரை பொறுமை காப்பது
கனவுக்கும் அவசியம்தான்!

எத்தனை காலம் பிடிக்கும் என்பதை
எழுதிப் பார்த்துக்கொள்!
எத்தனை இகழ்ச்சி! எத்தனை ஏளனம்!
எல்லாம் தாங்கிக்கொள்!

உன்னைக் காலம் உயர்த்திப் பிடிக்க
ஒருநாள் விடிந்துவிடும்!
பொன்னை வாட்டிய நெருப்பும் ஓய்ந்திட
புத்தொளி பிறந்துவிடும்!

நீயா என்று ஊரே வியந்திடும்
நாளுக்கு காத்திருநீ!
நீயார் என்று நீயே அறிந்திட
நாளன்று பார்த்திடுநீ!