வாழ்வில் போராடுங்கள்! வாழ்க்கையுடன் அல்ல… புத்தகத்திலிருந்து…
அடுத்தகட்ட வளர்ச்சி என்பது அசாதாரணங்களாலும் அசாத்தியங்களாலுமே சாத்தியமாகிறது. அசாதாரணமான நம்பிக்கை. அசாத்தியமான உழைப்பு. இந்த அம்சங்கள் யாரிடம் இருக்கின்றனவோ அவர்களுக்கு வெற்றி நிகழ்கிறது.
விபரம் புரிந்தவர்கள், வெற்றி தேவதையின் அசீர்வாதம் என்பார்கள். விபரம் புரியாதவர்கள் அதிர்ஷ்ட தேவையின் அசீர்வாதம் என்பார்கள். அதனாலென்ன? ஒன்றுக்கு இரண்டு தேவதையாய் இருந்துவிட்டுப் போகட்டுமே!
நீங்கள் உழைப்பால் ஜெயித்தீர்கள் என்று சிலர் சொல்லலாம். அதிர்ஷ்டத்தால் ஜெயித்தீர்கள் என்று பலர் சொல்லலாம். இதில் யாருக்கும் நீங்கள் தன்னிலை விளக்கம் தந்து கொண்டிருக்க அவசியமில்லை. அந்த நேரத்தில் அடுத்த உழைப்புக்கு அடிபோடுவீர்களென்றால், உங்கள் வியர்வையால் விளைந்த வெற்றி என்பதை உலகம் கண்டுணரும்.
அதே நேரம் அதிர்ஷ்டம் என்பது ஆகாத ஒன்றல்ல. வாழ்க்கை தரும் கூடுதல் போனஸ், அதிர்ஷ்டம். அதுவும் உங்கள் உழைப்புக்கான அங்கீகாரம் என்பதை உணருங்கள்.
தேடிவரும் வெற்றியும் அதிர்ஷ்டமும் தேவையான மேன்மைகள் கொடுக்கும். இந்த தேவைகளுக்கு தேதி கொடுங்கள். தேவதைகளைச் சந்திக்க சேதியும் கொடுங்கள்.
